Июнь: безнең тормышта ниләр үзгәрә?

Фото: Рәзилә Хәйретдинова, «ЯҮ»

1. Гаилә кэшбэгы: салымнан 7% кире кайтарыла

1 июньнән ике һәм аннан да күбрәк балалы ата-аналар салым түләве буенча гариза бирә ала. Дәүләт түләнгән НДФЛның 7%ын кире кайтара – ягъни, тормыш өчен ташлама. Гариза «Дәүләт хезмәтләре» порталында тутырыла. Акча счетка килә.

2. Вейплар – бары тик кибетләрдә генә

1 июньнән  электрон тәмәке һәм кальяннарны стационар булмаган сәүдә нокталарында сату тыела. Интернет аша сату, вендинг автоматлары – барысы да законсыз. Тартырга телисең икән, кибеткә барасың.

3. Каһвә һәм цикорий – «Намуслы билге» күзәтүе астында

1 июньнән һәр каһвә яки цикорий банкасын товарларны күзәтү системасында маркировкалыйлар. Сатучылар кассада кодларны сканерларга тиеш. Максат – базардан ялган һәм вакыты үткән товарларны чыгару.

4. Иске биналарга – цифрлы паспорт

1 июньнән ДОМ.РФ мәдәни мирас объектларының бердәм базасын эшләтеп җибәрә. Хәзер һәр һәйкәл-бинаның тулы электрон досьесы булачак: халәте, саклау бурычлары, фотосурәтләр. Реставрация өчен подрядчыларны эзләү җиңеләя, законсыз сүтеп алу – авырая.

5. Шиплар – җәйге саклагычка

1 июнь – 31 август – шипланган резина куллануның сезонлы тыелышы. Шиплар асфальтны боза, бигрәк тә эсседә. Июньгә кадәр алмаштырмагансыз икән, штраф әзерләгез.

6. Кунакханәләр ГОСТ буенча: йолдызларны сатып алып булмый

1 июньнән кунакханәләр һәм хостеллар өчен яңа милли стандартлар керә. Йолдыз алу өчен чыннан да таләпләргә туры килергә кирәк: номер зурлыгы, чистарту сыйфаты, хәтта кондиционер тавышы да.

7. Яңа телефон номеры – 100 сум

1 июньнән номер бүлеп бирү өчен дәүләт пошлинасы (элек бушлай иде) 100 сум тәшкил итә. Операторлар аны килешүгә кертәчәк.

8. Таможня дроннарны бәреп төшерү хокукы алды

2 июньнән таможнячылар үз постларына һәм хезмәткәрләренә янаучы дроннарга каршы корал һәм РЭБ чаралары куллана ала. Элек полицияне көтәргә кирәк иде. Хәзер үзләре тиз һәм кырыс җавап кайтара.

9. Ял – сугышчының балалары һәм әти-әниләре өчен хокук

5 июньнән, хәрби хезмәткәр инвалид булса, аның әти-әнисе һәм балалары белән бер үк вакытта еллык түләнә торган ял ала ала. Элек мондый өстенлек булмады.

10. КоАП катгыйлана: штрафлар һәм статьялар

21 июньнән Административ кодекска дистәләрчә төзәтмә керә. Миграция кагыйдәләрен бозу, маркировкаланган товарларны законсыз сату һәм «Намуслы билге»гә мәгълүмат бирүдән баш тарту өчен җаваплылык катгыйлана. Штрафлар арта, процедуралар төгәлләнә. Бизнеска – игътибарлырак булырга.

Июньдә тагын:

– маркетплейслар товарның тулы бәясен ачыкларга мәҗбүр (яшерен комиссияләрсез);

– барлык хәрбиләрдән геном теркәлү (ДНК-профиль) алдылар;

– махсус хәрби операциядә катнашучыларга контракт төзегәндә вакыты үткән кредитларны түләүдән азат итәләр;

– кыйммәтле металл калдыкларын чыгару тыелышы ел ахырына кадәр озайтылды.

Киләсе саннарда: июльдә нәрсә була – пенсияләр индексациясе, аучылыкның яңа кагыйдәләре һәм электрон самокатлар өчен штрафлар.