Дөрес туклану – үзе дәва. Кыяр белән помидор дусмы?
Җәйнең иң бай вакыты, җәмәгать, шөкер! Бакчаларыбызда үстергән мул уңышны вакытында җыеп, эшкәртеп, кышка ашарлык тәмлүшкәләрне әзерләп өлгер генә. Үзеңнекен өзеп, юып та тормыйча (чөнки бернинди химияләрсез үскән), итәк-ыштаныңа гына ышкып җибәреп, тәмләп ашаулары гына да ни тора бит!
Инде кыяр белән помидор салатыннан да күңел булды, болай гына, аерым-аерым тәмлерәк кебек. Һәм дөрес тә. Баксаң, гомер-гомергә без кушып, болгатып ашаган бу ике яшелчә дус түгел икән бит!
Алар катнашмасы ашказаны-эчәклек һәм үт суы юлларында проблемалары булганнарның ризык эшкәртү белән кыенлыклар тудыра ди. Кыяр – селте, помидор – кислота. Икесе бергә җылылык бүлеп чыгарып алар нейтральләшә һәм газ барлыкка китерә. Хәтта, косасы килергә, эч йомшарырга мөмкин.
Ашкайнату белән кыенлыкларыгыз булган очракта, бу яшелчәләрне кушып ашамавыгыз хәерле. Помидорны татлы борыч яки редис белән алыштырсагыз яхшырак булыр.
Хәтта сәламәт кешеләрдә дә аларның катнашмасы витаминнардан алыначак файданы киметә. Чөнки, кыярдагы аскорбиноз ферменты помидордагы С витаминын «җимерә».
Әмма мондый аныклаулар белән барлык белгечләр дә ризалашмый. Күбесе, шартлы сәламәт кешегә мондый салатның бернинди дә зыяны тими, дип бара.
Фото: Чулпан Гыйсмәтуллина, «ЯҮ»
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев