Уеннан уймак чыккан: нәни кызның аягы батареяга кысылып калган

Уфада аягы батареяга кысылып калган кызга коткаручылар ярдәме кирәк булган.

Сабый әнисе белән качышлы уйнаган вакытта батареяның секцияләре арасына аягын тыга, әмма кирегә тартып чыгара алмый. Әнисе баласына ярдәм итәргә тырышып карый, ләкин булдыра алмый. Шуннан ул коткаручыларга шалтырата.

Уфаның Гражданнарны яклау идарәсе хезмәткәрләре тиз арада килеп җитә һәм баланы «тозактан» азат итә. Балага медицина ярдәме кирәк булмый.

Әнә шулай уеннан уймак чыккан. Ярый ла сабыйга зыян килмәгән…

Өмет

Фото: https://ufa112.ru