«Русь» халык вокаль һәм «Йолдызым» татар җыры ансамб­ле «Волга» санаторий-профилакториясендә концерт оештырды

Зал тамашачылар белән шыгрым тулы иде. Концерт прог­раммасын «Йолдызым» татар җыры ансамбле ачып җибәрде. Репертуарда татар, башкорт халык һәм ретро җырлар яңгырады. Һәр чыгышны залда утыручылар зур алкышларга күмде. Татар җырына, татар моңына сусаганнар икән! Аннан сәхнәдә бер-бер артлы коллективыбыз­ның солистлары чыгыш ясады: Римма Асанова, Фәридә Нуруллина, Любовь Мишурина, Александра Афанасьева.

Коллективка күптән түгел генә килеп кергән Таһирә Богданова үзе иҗат иткән «Картлык» шигырен укыганда, зал тып-тын калды. Күпләре үз тормышын күз алдыннан үткәрде бугай, миңа шулай тоелды. Аны, шулай ук үзе иҗат иткән шигырьләре белән, Зоя Серова алыштыр­ды. Аның чыгышы да тамашачы күңеленә сары май булып ятты. Инде сәхнәгә «Русь» халык вокаль ансамбле чыкты һәм «Над Россией синь» җыры белән үзенең чыгышын башлап җибәрде.

Җырлар бер-бер артлы алышына торды, залдагы халык ансамбльгә кушылып җырлады, яңгыратып кул чапты, безнең белән елмайды, көлде, ә кайберләре күз яшьләрен тыя алмыйча елады да. Минем янымда утырган апа елый-елый: «Сез нишлисез? Шулай буламыни? Җырларыгыз белән бөтен тормышымны күз алдымнан үткәрдегез. Сезне тыңлаганда бөтен гәүдәмне каз тәне басты», – диде. Аның бу сүзләре минем өчен никадәр мөһим икәнен ул апа үзе аңладымы икән, белмим. Тик мин тагын бер кат үзебезнең дөрес юлдан баруыбызга инандым. Җыр-моңнарыбыз белән бары бер генә кешенең булса да күңелендә яктылыкка, матурлык­ка, гүзәллеккә омтылу уята алабыз, яраланган, бәргәләнгән җанына әз генә булса да шифа бирәбез, яшәргә, киләчәккә өмет тудыра алабыз икән – без бу дөньяда юкка яшәмибез! Концертыбызны үзенең дәртле җырлары белән аксакалыбыз Наил абый Гәрәев (рәсемдә) тәмамлады. Аның «Алай дип уйламадым», «Татарстан гөле» җырларына тамашачылар сызгыра-сызгыра кул чапты, уртага чыгып биючеләр дә булды!

Сәгать ярымлык концерт шундый тиз үтеп китте, үзебез дә сизми калдык. Тамашачы залдан бик канәгать булып, рәхмәт сүзләрен кыз­ганмыйча, елмаеп, күтәренке кәеф белән чыгып китте. Аллаһ теләсә, әле мондый концертларыбыз күп булыр. Бары тик иминлектә, авырмый яшәргә язсын, күкләребез аяз, илебездә тынычлык булсын!
 

Йолдыз Шәмгунова.
Яшел Үзән