Мәктәпләрдә яңа фәннәр кертелү, суд пошлиналары арту, ипотека торагын сату: сентябрьдән нәрсәләр үзгәрә

Мәктәпләрдә яңа фәннәр
Технология дәресләре 1-9нчы сыйныфлар өчен мәҗбүри булачак, 5-11нче сыйныфларда ОБЖ «Куркынычсызлык нигезләре һәм Ватанны сак­лау» фәнен алыштыра. Шулай ук, укучыларны «БПЛА технологиясен өйрәнү» кысаларында дроннар белән идарә итәргә өйрәтәчәкләр. «Безнең төбәк тарихы» курсы барлыкка килә.

Өстәмә эш өчен компенсация
Эш бирүчеләр, тариф ставкасы буенча гына түгел, ә премияләрне һәм башка стимуллаштыручы түләүләрне дә кертеп, хезмәткәрнең агымдагы хезмәт хакыннан чыгып, өстәмә эш өчен компенсация түләргә тиеш.

Такси өчен яңа таләпләр
Таксистлар, ОСАГОдан тыш, ташучының гражданлык җаваплылыгын мәҗбүри иминиятләштерүне рәсмиләштерергә тиеш. Ул булмаганда штрафлар 1 миллион сумга кадәр тәшкил итәчәк.
Инвалидларны һәм балаларны җәмәгать транспортыннан төшерү тыела. Кире очракта штрафлар 30 мең сумга кадәр җитә.

Прокурорларга һәм тикшерүчеләргә бронь
Югары уку йортын тәмамлаганнан соң ук прокуратурага һәм тикшерү комитетына эшкә кергән россиялеләр хәрби чакырылыштан кичектерү алачак.

Судка мөрәҗәгать иткән өчен дәүләт пошлиналары уннарча һәм йөзләрчә тапкыр артачак
Аерылышу турындагы гариза 600дән 5 мең сумга кадәр кыйммәтләнәчәк.
Иң зур артуны югары милек таләпләре булган дәгъвалар көтә.

Ипотека торагын сату
Ипотека торагын һәм залогка куелган милекне мөстәкыйль рәвештә һәм отышлы бәядән сатарга мөмкин булачак. Моның өчен банкка гариза бирергә һәм дүрт айга сыешырга кирәк. Әгәр бурычны түләгәннән соң акча калса, аны үзеңә алырга мөмкин булачак.

Бал кортларын саклау
Умартачыларны умарталык янында пестицидлар куллану турында биш көннән дә соңга калмыйча, шул исәптән ММЧ аша да кисәтергә тиешләр.