«Коточкыч тавышлар ишетелә». Иртәнге янгында бала һәм аның анасы вафат була

Хабаровск өлкәсендәге «Восход» бакчачылык ширкәтендә яшәүчеләр таң белән коточкыч тавышлар ишетеп уяна. Шәхси йортларның берсендә янгын чыга, һәм бала белән хатын-кыз һәлак була. Тагын 2 кеше имгәнә, аларны хастаханәгә озаталар.

Тикшерү башлана. Белгечләр сүзләренчә, һәлак булган малайга 4 яшь була, 8 яшьлек бала белән тагын бер хатын-кыз хастаханәгә озатыла.

Вафат булучы хатын-кызга 38 яшь, хастаханәгә эләккән 52 яшьлек хатын-кыз – өй хуҗасы. Ул бер малайны уттан алып чыгарга өлгерә.

Урынга янгын сүндерүчеләр килгәндә, өй инде дөрләп яна һәм җимерелеп төшә. Янгынны 5 сәгать чамасы сүндерәләр. Ут 76 квадрат метр мәйданга тарала.

Якынча версия буенча, янгын электр җиһазлары төзексез булу аркасында килеп чыга. Хуҗалар өйне электр җылыткычлар белән җылыткан була.

Фото: https://27.mchs.gov.ru