Казанда метроның икенче линиясенең беренче участогын 2027 елда ачу планлаштырыла

Яңа линиянең беренче чиратына дүрт станция керәчәк. Проектның бәясе 47 миллиард сум дип бәяләнә. Бу суммага станцияләр төзелеше, инженерлык коммуникацияләрен күчерүгә китәчәк 6 миллиард сум һәм тоннельләр казу эшләре керә.

«Станция + перегон» бер пуск комплексының уртача бәясе якынча 11,75 миллиард сум тәшкил итә. Аерым станцияләр төзелешенә чыгымнар чагыштырмача азрак. Мәсәлән, әзерлеге 95 проценттан арткан «Тулпар» станциясенә монолит эшләрен дә исәпкә алып, якынча 8–9 миллиард сум тотылачак.

Станцияләр 18–20 метр тирәнлектә урнашачак. Бу тайпрак урнашкан станцияләр өчен типлаштырылган проектлардан файдаланырга һәм төзелешнең үзкыйммәте артуны чикләргә мөмкинлек бирә.

«Тулпар» һәм «Зилант» станцияләреннән соң метро линиясен көньяк юнәлештә — Универсиада авылы ягына, аннан соң Республика клиник хастаханәсенә (РКБ) кадәр озайту планлаштырыла. Анда поездларның кире борылу юллары һәм яңа электр депосы төзеләчәк.

Икенче линиянең беренче участогын 2027 елда ачу планлаштырыла. Санкция чикләүләренә карамастан, Казан метрополитены төзелеш эшләрен билгеләнгән график буенча дәвам итә.

Исегезгә төшерәбез, моңа кадәр метроның яңа участогын 2028 елда ачу көтелә иде. Әмма төзелешкә өстәмә рәвештә 1,5 миллиард сум бүлеп бирелде.

Казань КП