Балалар бакчасында ике әни сугышкан

Бер әни улы белән бер төркемгә йөргән кызның әнисенә йодрыклары белән ташланган. Бу турыда “E1.RU” басмасына зыян күрүченең ире сөйләгән.
 

— Баласының күзлеге ватылган. Ул хатынымнан күзлек ремонтлау өчен акча таләп иткән. Янәсе, безнең кызыбыз аның баласын этеп җибәргән һәм күзлек ватылган. Шуннан сугыш чыккан, — дип сөйләгән ир. — Хатыным тән җәрәхәтләре алган, курткасы ертылган, чәчләре йолкынган. Болар камерага эләккән.
 

Сугышу моменты эләккән кадрларны хәзер полициядә өйрәнәләр. Зыян күрүче анда гариза белән мөрәҗәгать иткән.
 

— Хәзерге вакытта хәл тикшерелә. Нәтиҗәләр буенча тиешле карар кабул ителәчәк, — дип хәбәр итәләр Екатеринбург буенча Эчке эшләр идарәсе матбугат хезмәте.
 

Балалар бакчасында конфликт турында комментарий бирүдән баш тартканнар. Андагы җитәкчелек, әти-әниләр моны үзләре хәл итәр, дигән фикердә.
 

Чыганак: Ватаным Татарстан