Сөмбелә Абдуллина: «Ихлас кешеләр күңелдә эз калдыра»

Үзем инде күптәннән читтә — башка авылда яшим. Монда төрле районнардан килгән кешеләр белән аралашырга туры килә. Һәркемнең үз холкы, үз гадәте бар. Әмма кешене туган ягы түгел, ә күңел байлыгы бизи, дип уйлыйм. Мәктәптә эшләгән елларымда һәр баланы үземнеке кебек күрдем. Дин сабаклары укытканда да килгән кешене дә, килмәгәнен дә аермый идем. Хәтта дәрескә йөрмәгән балаларның өйләренә барып, чакырган чакларым да булды. Кешеләргә игелек белән мөрәҗәгать иткәндә генә нәтиҗәсе була.

Хәзер социаль челтәрләр аша туган авылым яңалыкларын күзәтеп барам. Туганнарым турында матур хәбәрләр күрсәм, күңел күтәрелә. Алар да безнең тормыш белән кызыксына. Шөкер, аралар ерак булса да, хәбәрләшеп яшәргә мөмкинлек бар. Бер нәрсә генә күңелгә тия. Минем әтием сугыш тәмамланганнан соң да озак вакыт ил чиген саклап хезмәт иткән. Әмма ул Биектау районы кешесе булганлыктан, безнең якта үткәрелгән чараларда аның хезмәте искә алынмый. Ә бит Ватанны саклаучының батырлыгы туган районына карап үлчәнергә тиеш түгел. Ил өчен көрәшкән һәр солдат бердәй хөрмәткә лаек.

Бу тормышта кешене дәрәҗәсенә, вазифасына карап бәяләү очраклары еш күзәтелә. Әмма Аллаһ каршында барыбыз да тигез. Һәр әйткән сүзебез, һәр кылган гамәлебез өчен җавап бирәчәгебезне онытмасак иде. Шул чакта кешеләр арасында да күбрәк хөрмәт, шәфкать һәм игелек булыр иде. Гомер юлында төрле кешеләр очрый. Әмма күңелдә озак елларга ихласлыгы, гадилеге, ярдәмчеллеге белән истә калганнары гына кала. Чын байлык та, минемчә, нәкъ менә шундый кешеләр белән аралашып яшәүдә.

Сөмбелә Абдуллина,
Бишнә