Татарстан Республикасы 2025 елдан «Тормыш өчен инфраструктура» составына кергән «Уңайлы шәһәр мохитен формалаштыру» федераль проекты чараларын гамәлгә ашыру белән актив шөгыльләнә. Узган ел республикада 65 иҗтимагый киңлек төзекләндерелгән. Быел, 2026 елда, 51 объектны төзекләндерү планлаштырылган, хәзерге вакытта эшләр 70%ка үтәлгән, дип хәбәр итә ТР Төзелеш министрлыгы матбугат хезмәте.
Россия Федерациясе Хөкүмәте матбугат хезмәте үз чиратында билгеләп үткәнчә, Татарстанда проектны гамәлгә ашыруның масштаблы мисалларының берсе — Әлмәттә сусаклагыч территориясен төзекләндерү. Сулык ярларында вело- һәм йөгерү маршрутлары, спорт мәйданчыклары, гриль-зоналы пикник нокталары, балык тоту һәм йога өчен күп дәрәҗәле пирслар, сапбордлар һәм көймәләр өчен причаллар, шулай ук кошларны күзәтү өчен смотровой вышкалы экопарк барлыкка килде. Хәзер биредә кафелар һәм прокат ачыла, инструкторлар хезмәтләре тәкъдим ителә, фестивальләр, ярышлар, экоакцияләр һәм концертлар уза.
Россия Хөкүмәте Рәисе Марат Хөснуллин хәбәр иткәнчә, 2025 елда илдә 10 меңнән артык иҗтимагый һәм ишегалды киңлеген яңартырга, шулай ук Уңайлы шәһәр мохитен булдыру буенча иң яхшы проектлар Бөтенроссия конкурсының 274 җиңүче проектын гамәлгә ашырырга мөмкин булды. Россия Президенты Владимир Путин карары белән 2025 елда «Тормыш өчен инфраструктура» илкүләм проектына кергән «Уңайлы шәһәр мохитен формалаштыру» федераль проекты шәһәр мохитен яхшыртуның иң нәтиҗәле коралларының берсенә әверелде, дип ышандырды ул.
Моннан тыш, Хөснуллин кабат кушылган төбәкләргә зур игътибар бирелүен ассызыклады, анда 2025 елдан илкүләм проект кысаларында 106 территория тәртипкә китерелгән һәм бөтенроссия конкурсы нәтиҗәләре буенча 11 проект гамәлгә ашырылган.
Вице-премьер бәяләвенчә, төзекләндерү коммерция активлыгын стимуллаштыра – локаль производстволарны көчәйтү, кече бизнесны үстерү һәм эш урыннарын булдыру. Шулай итеп, илкүләм проект башланганнан бирле конкурс җиңүчеләре проектларын гамәлгә ашыру бөтен ил буенча 4 меңнән артык эш урыны булдыруны тәэмин итте, ә яңартылган территорияләрдә 905 коммерция объекты ачылды.
«Бу — кешеләр өчен иң соралган юнәлешләрнең берсе — гражданнар реаль үзгәрешләрне күрсеннәр һәм шәһәрләрендә һәм авылларында тормыш уңайлырак була баруын тойсыннар өчен бу мөһим», – дип өстәде Марат Хөснуллин.
Россия илкүләм проектлары — җәмгыять тормышының төп өлкәләрен үстерүгә юнәлтелгән масштаблы дәүләт программалары. Алар Россия Президенты Владимир Путин раслаган милли максатларга ирешүнең һәм илнең 2030 елга кадәр социаль-икътисадый үсеш стратегиясен гамәлгә ашыруның төп коралларының берсе булып тора. Россия Дәүләт советының «Тормыш өчен инфраструктура» илкүләм проекты буенча комиссиясен Татарстан Рәисе Рөстәм Миңнеханов җитәкли.
Нет комментариев