Роспотребнадзор кисәтә: Прививка олысына да кирәк, кечесенә дә

Көз җитте, димәк ОРВИ һәм грипп белән авыручылар саны сезонлы артачак. Соңгысыннан иң нәтиҗәле саклану – вакцинация. Гриппка каршы прививкалар турындагы иң популяр сорауларга «Татарстан Республикасы гигиена һәм эпидемиология үзәге» ФБУЗның Яшел Үзән филиалы табибы Надежда Александрович  җавап бирә.

– Прививка кемгә кирәк?

– Гриппка каршы прививка ясату «хәвеф-хәтәр төркемнәренә» керүчеләр өчен аеруча мөһим, чөнки авыру төрле авыр өзлегүләргә китерергә мөмкин. Бу категориягә керә:

 • 6 айлык балалар һәм яшүсмерләр;

 • өлкән яшьтәгеләр;

 • йөкле хатын-кызлар;

 • хроник авырулары (шикәр чире, йөрәк-кан тамырлары һәм  сулыш органнары авырулары) булган затлар.

Шулай ук вакцинация сәламәтлек саклау, мәгариф өлкәсе хезмәткәрләренә һәм инфекция йоктыру куркынычы югары булган башка һөнәр ияләренә дә кирәк. Гриппка каршы планлы вакцинация вакцинаны бер тапкыр кертүне күздә тота (беренче тапкыр прививка ясатучы кечкенә балалардан тыш).

– Вакцинацияне кайчан узу яхшырак?

– Иң кулай вакыт дип көз башы (сентябрь-октябрь) санала. Бу прививкадан соң саклагыч антитәнчекләр эшләп чыгару өчен 2-4 атна вакыт кирәк булу белән бәйле. Соң иммунизация, мәсәлән, эпидемия вакытында, кирәкле яклау бирмәскә мөмкин, чөнки иммунитет формалашырга өлгерми.

– Нинди вакциналар бар?

– 2025-2026 еллар сезонына Бөтендөнья сәламәтлек саклау оешмасы грипп вирусларының түбәндәге штаммнарын үз эченә алган өч һәм дүрт валентлы вакциналар кулланырга киңәш итә:

 • A/Victoria/4897/2022 (H1N1)pdm09;

 • A/Croatia/10136RV/2023 (H3N2);

 • B/Austria/1359417/2021 (B / Victoria линиясе);

 • B/Phuket/3073/2013 (B / Yamagata линиясе).

– Ни өчен ел саен вакциналашу мөһим?

– Гриппка каршы вакцинация бер сезонга гына саклануны тәэмин итә. Грипп вируслары даими рәвештә мутацияләнә һәм сезон саен яңа штаммнар барлыкка килә. Шуңа күрә актуаль вируслардан саклану өчен ел саен прививка ясатырга кирәк.

– Укол ясалган урынны чылатып буламы?

– Вакцина мускул эченә ясала, бу вакытта тире аз гына зарарлана. Шуңа күрә дым эләгү бернинди дә күңелсез нәтиҗәләргә китермәячәк. Әмма бассейнга һәм мунчага барудан берничә көнгә тыелып тору яхшырак. Шулай ук укол урынын каты мунчалалар белән кашырга һәм ышкырга кирәкми.

Фото: ясалма интеллект