Җиде ел ирем белән аерым яшәгәннән соң, яңадан кавыштык. Бу очракта безгә никахны яңарту мөһимме?

Фото: Рәзилә Хәйретдинова, «ЯҮ»

– Никах гамәлләренә килгәндә, аның чынбарлыгы күзлегеннән караганда, вакыт хәлиткеч әһәмияткә ия түгел. Барлык кануннар буенча төзелгән никах килешүенең «яраклылык срогы» юк һәм күп еллар узганнан гына гамәлдән чыкмый. Никах үз көчен чиксез озак саклый – ул үзеннән-үзе җимерелми һәм ир белән хатынның аралашмавы аркасында югалмый. Никах бары тик бер очракта гына: әгәр ир турыдан-туры һәм икеләнмичә хатынына карата аерылышу турында сүз әйтсә (талак) өзелә. Бары тик шундый турыдан-туры ихтыяр белдерү генә никах бәйләнешләрен өзүнең законлы сәбәбе булып тора. Димәк, әгәр җиде ел элек ир хатынына аерылышу турында хәбәр итмәгән булса (талак әйтмәсә), аларның никахы әлегә кадәр тулы көчендә кала. Бу вәзгыятьтә аны кабат башкаруга яки «яңарту»га бернинди дә ихтыяҗ юк. Никахлары гамәлдә дип санала.