Участок сайлау комиссияләре Татарстанда көзге сайлаулар өчен ачылды

Татарстанда 2 сентябрьдән 2,8 мең участок сайлау комиссиясе эшли башлады. Бу хакта Татарстан Республикасы Үзәк сайлау комиссиясе рәисе Андрей Кондратьев хәбәр итте.

"Сайлауларны оештыруга 65 территориаль, 2806 участок сайлау комиссиясе җәлеп ителәчәк, шул исәптән, 46 сайлау комиссиясе сайлаучылар вакытлыча булу урыннарында. Бу хастаханәләр, тикшерү изоляторлары, шифаханәләр, аэропорт һәм тимер юл вокзалы ", - дип билгеләде Кондратьев.

Аның сүзләренчә, хәзер сайлау комиссиясе әгъзалары сайлаучылар исемлекләрен төгәлләштерү эшенә керешәләр. Моннан тыш, сайлаучылар "Мобиль сайлаучы" механизмы буенча тавыш бирүгә гариза бирү өчен УИКка мөрәҗәгать итә ала. Ул гражданнар өчен, кайда теркәлүенә карамастан, теләсә нинди уңайлы участокта тавыш бирергә мөмкинлек бирә.

Үз сайлау участогын Татарстан Үзәк сайлау комиссиясе сайтында "сайлаучылар өчен цифрлы сервислар" вкладкасында табарга мөмкин. Шулай ук, үз участогын Telegram мессенджерында "Минем сайлау участогы" чат-боты табарга ярдәм итәчәк. Участок сайлау комиссияләре документларны 8 сентябрьгә кадәр кабул итә.

Татарстанда 11-13 сентябрьдә ТР Президентын сайлаулар, РФ Дәүләт Думасына Түбән Кама сайлау округы буенча сайлаулар һәм республика Дәүләт Советы депутатларының Алабуга районы буенча сайлаулар, шулай ук массакүләм муниципаль сайлаулар узачак.