Татарстанда һава торышы бозылганда куркынычсызлык кагыйдәләрен үтәргә киңәш ителә

Татарстан Гидрометерология һәм әйләнә-тирә мохитне күзәтү идарәсе мәгълүматлары буенча, иртәгә республикада яшенле яңгыр, көчле җил, боз яварга мөмкин. Бу турыда Россия Гадәттән тыш хәлләр министрлыгының ТР буенча идарәсе матбугат хезмәтенә сылтама белән “Татар-информ” хәбәр итә.

5 июльдә иртән һәм көндез республика территориясендә яшенле яңгыр вакытында җилнең тизлеге 22 м/с ка кадәр җитәргә мөмкин.

Яшен вакытында өйдән урамга чыкмаска, тәрәзә янында тормаска киңәш ителә.

Урамда булган очракта, ышыклану өчен урын табарга кирәк. Агач астына качарга ярамый. Җил һәм эре боз ботакларны сындырырга мөмкин, ә бу имгәнүгә һәм җәрәхәтләргә китерәчәк.

Көчле җил булган очракта, электртапшыру челтәрләре, агачлар, киштәләр һәм йорт кәрнизләре янында тормау сорала. Бу очракта якындагы подъезга яки подвалга качарга киңәш ителә.

Машина йөртүчеләргә ерак сәфәрләрне кичектерергә һәм торак пунктлардан чыкмаска киңәш ителә. Юлда хәрәкәт иткәндә, яшенле яңыр башланса, куркынычсыз тизлек сайларга, игътибарлы һәм сак булырга киңәш ителә.

Фото: pixabay.com/