Татарстан халкын язның беренче көнендә буран һәм көчле җил көтә

Бүген, 1 март көнне, төнлә һәм көндез Татарстан территориясендә, шул исәптән Казанда да, күз күреме начарлана һәм секундына 15 метрга кадәр көньяк-көнбатыштан көньяк-көнчыгышка үзгәрүчән җил белән буран көтелә.

Республикада болытлы һава торышы саклана. Вакыты белән кар явачак, урыны белән юеш кар сибәләячәк. Кайбер урыннарда бозлавык булырга мөмкин. Юлларда бозлавык хасил була.

Көндез һава температурасы төбәк буенча -3тән +1 градуска кадәр җылына.

Элегрәк, Татарстан синоптиклары фаразлары нигезендә, 2 мартка кадәр, республикада төньяк атлантик циклоннар йогынтысында явым-төшем күп булган болытлы һава урнашачагын хәбәр иткән идек.

Чыганак «Татар-информ» мәгълүмат агентлыгы