Шәһәр күлендә 23 яшьлек егет батып үлде

Урынга  Яшел Үзән янгын-коткару гарнизоны, полиция, медицина ярдәме күрсәтү хезмәткәрләре чыга. Суга батучының иптәшләре сөйләвенчә, төнлә алар компания белән күл буенда ял иткәннәр, исерек булганнар. Кайсыдыр мизгелдә 23 яшьлек егет агач конструкциядән суга сикерә һәм күл уртасындагы фонтанга таба йөзә башлый. 50 метр тирәсе йөзгәннән соң су астына китә.

Фаҗига чыккан урынга Казаннан зона эзләү-коткару отряды хезмәткәрләре чакыртыла. Егетнең гәүдәсен водолазлар судан иртәнге дүртләрдә чыгара.

Шуны искәртергә кирәк, шәһәр күлендә су коену катгый тыелган. Кисәтү билгеләре су буйларына куелган. Әмма, билгеле булганча, исереккә диңгез тубыктан. Хәтта салкын көннәрдә дә кешеләр суга керүдән курыкмый. Кайвакыт шәһәр күлендә балалар да коена.

Яшел Үзән янгын-коткару гарнизоны һәм ГИМС хезмәткәрләре халыкны кисәтеп шуны җиткерә: махсус җиһазландырылмаган урыннарда коенырга ярамый. Салмыш килеш бигрәк тә. Балаларны да су буйларында караучысыз калдырмагыз.

Резидә Йосыпова