Рөстәм Миңнеханов: Татарстан «Абилимпикс» хәрәкәтенә ярдәм итәчәк һәм үстерәчәк

Татарстан алга таба да "Абилимпикс" хәрәкәтен хуплаячак. Бу хакта Татарстан Республикасы Президенты Рөстәм Миңнеханов Казанда инвалидлар һәм сәламәтлек мөмкинлекләре чикләнгән затлар арасында һөнәри осталык буенча VI милли чемпионат җиңүчеләре һәм призерлары белән очрашуда белдерде.

"Узган елларда бу чемпионат сәламәтлекләре буенча чикләүләр булган кешеләрнең һөнәри ориентациясе һәм мотивациясе өчен старт мәйданчыгы булды. Без бу хәрәкәтне алга таба да хуплаячакбыз һәм үстерәчәкбез, аның стандартларын гомуми белем бирү практикасына кертәчәкбез», - диде Татарстан Республикасы Президенты.

Рөстәм Миңнеханов билгеләгәнчә, узган ел ярышлар яңа дистанцион форматта узды, бу чемпионатны масштаблырак итәргә мөмкинлек бирде.

«Татарстан җыелма командасы 84 медаль һәм медальон яулады, икенче гомумкоманда урыны. Бу бик яхшы нәтиҗә. Лаеклы җиңү белән котлыйм. Сез барыгыз да төрле, ләкин сезне ихтыяр көче, хезмәт һәм үҗәтлек берләштерә. Сез үз максатыгызга кыю ирешергә тырышасыз һәм аны гамәлгә ашыру өчен мөмкин булганның барысын да эшлисез. Әмма сезнең нәтиҗә - тренерларның, укытучыларның, экспертларның уртак хезмәте”, - дип мөрәҗәгать итте Татарстан Республикасы Президенты конкурсантларга.

Ул шулай ук мондый чемпионатта катнашучылар "һөнәри һәм конкурс тәҗрибәсе кебек зур тәҗрибә алды" дип ассызыклады. Миңнеханов фикеренчә, тупланган тәҗрибә "алдагы карьерада һәм шәхси үсештә бәяләп бетергесез өстенлек бирәчәк". «Ышанам ки, сезнең һәркайсыгыз туган Татарстаныгызда үз урынын табар», - диде ул.

Конкурсантлар әзерләүгә өлеш керткәннәре өчен Рөстәм Миңнеханов педагогларга ТР Президентының Рәхмәт хатларын тапшырды.