Күңелемдәгесен әйтәм

Ул «Авангард» спорт комп­лексын гына карагыз әле сез. Ничек яңарттылар, төзекләндерделәр бит! Без дә каникулда балаларны тимераяк­та шудырып кайтырга булдык. Арт ягыңны борып булмаслык кеп-кечкенә бүлмәдә тимер­аякларны прокатка алып була икән. Документыңны калдырасың да, 150 сумыңны түләп, бер сәгатькә тимераяклы буласың. Ә үзең киеп куйган итегеңне кайда калдырырга? Шунда инде кая булсын тагын, аяк астында, урын тапсаң! Сиңа монда йозаклы шкафлар әзерләп куймаганнар. Соң ул сапогиларны үзең белән күтәреп йөреп булмый бит инде, ә аяк астыннан берәү алып чыгып китмәс дип кем ышандырып әйтә ала? Анда бит кем чыккан һәм кергәнне карап торган кеше юк. Иң мөһиме акча эшләргә булсын аларга. Тәртипкә салсыннар иде.

***

Гел начар яшибез, акча җитми дип зарланабыз. Шөкер, алай ук начар гомер итмибез икән әле, райондашлар. Менә бу Яңа ел бәйрәмен генә алыйк. Бер кичтә утырып сыйлану өчен күпме ризык ташыдык, кибет киштәләрен бушаттык. Азмы-күпме бүләкләр бирештек, матур киемнәр алдык. Ә бәйрәм ялларында һавага күпме аллы-гөлле салют кына очты. Оча-оча мең сумнар оча, дип рәхәтләнеп карадык. Авыл да шәһәрдән кимен куймады. Төне буе шарт-та шорт. Йә, кайсыгыз тормыш авыр дип зарлана әле анда?!

***

2019 елның төп юлламасы «Без Мирныйга барабыз» дигән сүзләрдән гыйбарәт. Әлбәттә, Мирный бистәсе елдан-ел яшәрә, биредә яшәүче яшь гаиләләр саны артканнан-арта. Менә әле яктыртылган чаңгы юлы ачып шатландырдылар. Ялларда «Маяк» спорт комплексына кадәр баруы ерак иде. «Авангард» стадионындагы кебек бер матур гына шугалак та ачып куйсалар, ничек шәп булыр иде. Урамда, саф һавада тимераякта шууга ни җитә?! Бер карасаң, боз катырып кую өчен миллионнар кирәкми дә. Бәлки фикеремә колак салырлар.