«Дуслар очрашуы» күңел ачу-сәламәтләндерү акциясе онытылмаслык булды!

Яшел Үзән районының тәрбиягә бала алган гаиләләре 2014 елдан бирле "Рассвет" клубына берләшеп, бер зур тату гаилә булып яши. Безнең район гаиләләре бик актив, иҗади, спорт сөючән һәм ачык күңелле. Табигатьтәге әлеге очрашу да моның тагын бер дәлиле булды.

Чараны оештыручылар - "Норлат балалар йорты" каршындагы тәрбиягә бала алган гаиләләрне күзәтү һәм ярдәм итү хезмәте һәм Норлат мәдәният йорты. Яшел Үзән районы башкарма комитетының опека һәм попечительлек бүлеге белгечләрен дә үзебезнең җылы даирәдә күрүебезгә бик шат булдык.
Бәйрәмне үткәрүдә Казаннан кунакка килгән дусларыбыз "Чиста йөрәкләр" зур ярдәм күрсәтте.

Балаларны бик күп кызыклы уеннар, конкурслар, сабын куыклары шоулары, чын фокусчы чыгышы, матур концерт программасы һәм бик күп бүләкләр шатландырды. Көне буе тәмле шашлык, самавырдан чәй, тәм-томнар бетмәде, тылсымлы атмосфера һәм яхшы кәеф хөкем сөрде.
Кунаклар өчен тагын бер могҗиза - чын мараллар яшәгән тыюлыкка бару булды. Балалар аларны ипи белән сыйлады һәм искиткеч боланнар белән фотога төште.

Балалар чиксез уңай хис-кичерешләр һәм онытылмаслык мизгелләр, ә өлкәннәр - бик күп тәэсирләр һәм уңай заряд алдылар!!!

"Рассвет"тәрбиягә бала алган гаиләләр клубы җитәкчесе чакырган Ютуб канал операторларының бердәм командасының килүе көтелмәгән хәл булды. Үз эшенең осталары көне буе безнең белән ял итте һәм дусларның онытылмас очрашуын видеога төшерде!

Рәисә Миңнуллина
«Рассвет» Яшел Үзән районы тәрбиягә бала алган гаиләләр клубы җитәкчесе