26 август көнне Байлар Сабасында әдәби марафончыларның зур #Әдәбисабантуе уздырылды

Без дә Яшел Үзән әдәби марафончылары, бу матур чарада катнашып, хозурланып кайттык. Чибәр кызлар Сабаларга гына хас булган кунакчыллык белән барлык әдәби марафончыларны ипи-тоз белән каршы алып тордылар.
Бәйрәм Саба районы бию коллективларының Сабантуй күренеше белән башланып китте. Аннан әдәби сабантуеның байрагын күтәргәндә мәйдандагы бар халык торып басып әдәби марафон гимнын җырлады.
Чара #әдәбимарафон, #авылымгүзәллеге финалистларын бүләкләү белән беррәттән матур җырлар белән үрелеп барды.
Мәйданда татар халык уеннары, җыр-биюләр гөрләп торды. Сабантуеның иң матур ноктасы #әдәбикөрәш. Анда катнашучыларга көч-куәт биреп, алар өчен җан атып тордык. Һәм зур тырышлыклар белән гран-прины Саба кызы алды.
-Бәйрәм матур, күтәренке рухта узды! Шушы әдәби сабан туена үз өлешен керткән һәркемгә олы рәхмәтләребезне җиткерәм. Киләсе әдәби сабантуйларында да исән имин күрешергә насыйп булсын иде дигән теләктә калам, - дип яза Мулла Иле мәдәният йорты мөдире Рәзинә Сәйфетдинова.