Нәрсә соң ул – бәхет?

Өч тамчы зирәклек
Бәхет турында өч төрле күзаллау

Якты дөньяларда өч дус яшәгән һәм һәрберсе үз бәхете турында хыялланган. Әмма бәхет аларга төрлечә күзалланган. Беренчесе, бәхет – байлыкта дип уйлаган, икенчесенә сәләт бәхет булып тоелган, ә өченчесе бәхетне – гаилә дип санаган.
Тиздерме, озактырмы, алар барысы да үз бәхетләренә ирешкән. Әмма һәр нәрсәнең ахыры була. Аллаһ хозурына күчәр сәгатьләре җиткәндә, тормышларына нәтиҗә ясау өчен, очрашкан болар. Беренчесе әйткән:
– Бай булдым мин, әмма бәхет тоймадым. Бу дөньядан саран һәм кешеләрне күрәалмас адәм булып китәм.
Икенчесе:
– Мин сәләтле булдым, әмма бәхетле түгелмен. Тормыштан ялгызлыктан алҗып китәм, – дигән.
– Ә мин бәхетнең нәрсә булуын татыдым, – дигән өченчесе, – теге дөньяга якыннарым тарафыннан кадер-хөрмәт күреп, яратылып китәм һәм үземнән соң җир йөзендә иң кыйммәтле нәрсә – яңа кешеләр калдырам.