Татарстанның Электрон мактау тактасы лауреатлары галереясендә Казанның 5 323 кешесе, шул исәптән мәдәният эшлеклеләре тәкъдим ителгән. Бу хакта Татарстан Мәдәният министрлыгы хәбәр итә.
Лауреатлар арасында – La Primavera Казан камера оркестрының директоры – сәнгать җитәкчесе һәм баш дирижеры, РФ һәм ТРның атказанган сәнгать эшлеклесе, Татарстанның халык артисты, Дуслык һәм «Дуслык» орденнары кавалеры Рустем Абязов.
Шулай ук исемлеккә ТР һәм РФның атказанган сәнгать эшлеклесе, «Алтын битлек» Милли театр премиясе номинанты, Г. Камал исемендәге Татар дәүләт академия театрының баш режиссеры Фәрит Бикчәнтәев; ТРның атказанган артисты, Татарстан Республикасы Филармония джаз-оркестрының сәнгать җитәкчесе һәм баш дирижеры Сергей Васильев керделәр.
Лауреатлар булып ТРның атказанган һәм халык артисты Алинә Шайгарданова һәм Татарстанның атказанган артисты, Муса Җәлил исемендәге Татар опера һәм балет театрының прима-балеринасы Аманда Гомес билгеләнделәр.
«Республиканың барлык казанышлары һәм уңышлары – күп буын татарстанлыларның хезмәте. Хезмәт кешеләре безнең барыбыз өчен дә профессионализм, үз эшенә тугрылык, Ватанга намуслы хезмәт итү үрнәге булып тора», – дип билгеләп үткән иде республика Рәисе Рөстәм Миңнеханов.
Татарстан Республикасының Электрон мактау тактасы Татарстан Рәисе указы белән гражданнарның дәүләт, җитештерү, фәнни-тикшеренү, социаль-мәдәни, җәмәгать һәм башка эшчәнлек өлкәләрендәге республиканың икътисади, социаль һәм мәдәни үсешенә юнәлтелгән күренекле нәтиҗәләрен җәмәгатьчелек таныр өчен гамәлгә кертелгән.
Нет комментариев