«Светофорның каникулы юк»: Олы Ачасырда юл хәрәкәте кагыйдәләре буенча белем бирү чарасы узды

Чараның беренче өлешендә балалар беренче светофорның барлыкка килү тарихы белән таныштылар. Алар аны кем уйлап тапканы, дөньяның төрле илләрендә светофорлар кайчан пәйда булуы турында кызыклы фактлар белделәр. Бу белем аларга хәзерге юл хәрәкәте кагыйдәләренең килеп чыгышын аңларга ярдәм итте.

Аннары балалар юл йөрү кагыйдәләре белән бәйле табышмакларга җавап эзләделәр, түбәндәге уеннарда һәм бәйгеләрдә актив катнаштылар:

• «Бу мин, болар барысы да минем дусларым» – балалар юл хәрәкәте кагыйдәләрен үтәүче дуслары турында сөйләде.
• «Бу ярый – бу юк» – төрле хәлләрне тикшереп, нәрсә дөрес, нәрсә дөрес түгел икәнлеген билгеләделәр.
• «Светофор сигналлары» – светофорның кызыл, сары, яшел төсләренең мәгънәсен аңлатып, тиз реакция күнекмәләрен сынадылар.
• «Рөхсәт ителә – тыела» – юл йөрү кагыйдәләре буенча нәрсә эшләргә ярый, нәрсә ярамый икәнлеген бергәләп карадылар.

Каникул вакытында балалар урамда, юл янында күбрәк вакыт үткәрә. Шуңа күрә аларга бу чорда куркынычсызлык кагыйдәләрен искә төшерү һәм яңа белемнәр бирү бик әһәмиятле. Оештыручылар әлеге чара балаларның юлда үз-үзләрен дөрес тотарга өйрәнүенә ярдәм итә, дип ышана.