Актив тормыш – күңел яшьлеген саклый
#яшелүзәнрайонытуганавылым

Актив тормыш – күңел яшьлеген саклый

«Актив озын гомер» федераль программасы кысаларында Күгәй авылы өлкәннәре Кайбыч районына сәяхәт кылды. Әлеге сәяхәт өлкәннәр өчен күңелле ял гына түгел, ә яңа тәэсирләр, файдалы мәгълүмат һәм аралашу мөмкинлеге дә булды.

Фотолар Күгәй мәдәният йорты ВК сәхифәсеннән алынды

Сәяхәт барышында өлкәннәр яңа урыннар белән танышты, күренекле истәлекле урыннарны күрде, үзара аралашты, яңа танышлар тапты. Мондый чаралар өлкән яшьтәге кешеләрнең тормышын тагын да баета, аларга көндәлек мәшәкатьләрдән арынып, күңел күтәренкелеге белән ял итәргә мөмкинлек бирә. Яңа урыннар күрү, хәрәкәттә булу, аралашу һәм яңалыклар белән танышу – болар барысы да сәламәтлекне ныгытуга, активлыкны саклауга ярдәм итә.

Күгәй авылында өлкәннәрнең тормышы һәрвакыт кайнап тора. Алар авылның иҗтимагый һәм мәдәни тормышында теләп катнашалар. Язгы һәм көзге өмәләрдә авылны төзекләндерүгә үз өлешләрен кертәләр, мәдәният йортында оештырылган түгәрәкләргә йөриләр, төрле бәйрәмнәрдә һәм мәдәни чараларда актив катнашалар.

Фото: Күгәй мәдәният йорты ВК сәхифәсеннән алынды

Өлкәннәребезнең тормышка булган кызыксынулары, энергияләре, аралашырга һәм яңалыкларга омтылулары соклануга лаек. Алар яшь буынга да үрнәк булып торалар.

«Актив озын гомер» программасының төп максаты да – өлкән яшьтәге кешеләргә актив, сәламәт һәм тулы канлы тормыш алып бару өчен мөмкинлекләр тудыру. Күгәй авылы өлкәннәренең сәяхәте әлеге максатның тормышка ашырылуына матур бер мисал булып тора.

Чыннан да, яшьне еллар белән генә түгел, күңел халәте белән дә билгелиләр. Күңел яшь, йөрәк дәртле булганда, тормышның һәр көне яңа ачышлар һәм матур мизгелләр бүләк итә!


Нет комментариев