Татарстан мөфтие Ураза бәйрәме алдыннан мөселманнарга мөрәҗәгать итте

Фото: © Салават Камалетдинов / «Татар-информ»

«Рамазан ае бер мизгелдәй узып китте: бүген кояш баегач, мөселманнар Ураза бәйрәмен каршы ала, ә иртәгә бәйрәм итәчәк. Быел гает тагын бер олуг бәйрәм – мөбарәк җомга көненә туры килә, бу Ураза бәйрәменә тагын да зур тантаналылык өсти, ә җомганы аеруча мөбарәк итә. Мин сезне чын күңелдән бу бәйрәмнәр белән котлыйм!» – диде мөфти үз мөрәҗәгатендә.

Бу айда мөселманнарның күңелләре Хак Тәгаләнең рәхмәтенә, аның ярлыкавына һәм гөнаһлар йөгеннән азат ителүгә өмет тула. Рамазанда Аллаһы Тәгалә башка бер айда да булмаган кадәр юмарт бүләкләр бирә, дип билгеләп үтте мөфти.

Ул шулай ук Ураза бәйрәме – иң элек ураза тотып түзелгән гөнаһлардан ярлыкану бәйрәме икәнен, ә ярлыкану – Хак Тәгаләнең иң зур бүләге икәнен искә төшерде.

«Шул ук вакытта мин сезне, хөрмәтле кардәшләр, бер изге нияткә чакырам: әйдәгез, Ураза бәйрәме хөрмәтенә без кемгә рәнҗегән булсак, шуларның барысын да гафу итик! Әйдәгез, безне аңлы рәвештә яки белмичә, очраклы рәвештә рәнҗеткән һәркемне гафу иткәнебезгә шаһит булыйк», – дип белдерде мөфти.

Аерым ул Рамазан аенда махсус хәрби операция зонасында булган һәм Ватан сагында торган мөселман сугышчыларны котлады. Мөфти мөселманнарның үз сакчылары өчен һәрчак дога кылуын ассызыклады.

Мөрәҗәгатенең ахырында мөфти барлык мөселманнарга бәхет, игелек һәм иминлек теләде.

«Хак Тәгалә күңелләребезне иман, көч, шәфкать һәм мәхәббәт белән тутырсын! Ураза гаете мөбарәк булсын!» – диде Камил хәзрәт Сәмигуллин.

Татар-информ