Беркөнне әни йокыдан махсус иртәрәк торган. Көтү куган вакыттан да алдарак уянуының сәбәбе бар. Җәй көне авылда кунаклар күп, бала-чага тавышы көне буе тынмый, шуңа күрә иртәнге тынлыкта торып, бертуган сеңлесе Фәния Әхмәтҗанованың яңа чыккан китабын укырга утырган ул. Ят тавышка сискәнеп уянып китсәм, әнием «Ватаным» китабын кочаклап елап утыра иде. «Ватан ул нәселең нык булуга инанудан башлана икән», – диде әнием күз яшьләре аша. Бу китапның миңа, гаиләмә, туганнарыма, гомумән, әлеге басмада телгә алынган һәркемгә ни дәрәҗәдә әһәмиятле һәм кирәкле икәнен әнә шул мизгелдә аңладым кебек.
