Соңгы вакытта Яшел Үзәннең сәүдә нокталарыннан товар урлау факт­лары күбәеп бара

Соңгы вакытта Яшел Үзәннең сәүдә нокталарыннан товар урлау факт­лары күбәеп бара. Шундыйларның берсе менә шушы көннәрдә генә теркәлә.

Эчке эшләр бүлегенә спорт кибетләренең берсе вәкиле товар урлау турында гариза белән мөрәҗәгать итә. Гариза бирүче сүзләренчә, күзәтү камераларыннан ул билгесез кешенең, кибет киштәсеннән кроссовка сайлап, товар өчен түләмичә, сәүдә ноктасыннан чыгып китүен күргән. Китерелгән зыян суммасы 5 мең сумнан артык тәшкил итә.

Оператив-эзләү чаралары барышында полиция хезмәткәрләре әлеге җинаятьне кылуда шикләнелгән кешене тоткарлый. Ул Әлмәт районында яшәүче 40 яшьлек кеше булып чыга. Ир-атка бу очракта кылган гаебен танырга гына кала. Әлбәттә, әлеге факттан чыгып, РФ ҖКның 158нче маддәсенең 1нче өлешендә каралган билгеләр буенча җинаять эше кузгатыла.