«Одноклассники» социаль челтәренең татар телендәге версиясе эшли башлады

«Одноклассники» социаль челтәренең татар телендәге версиясе эшли башлады. Бу хакта компаниянең матбугат хезмәте хәбәр итә.

Яңа тел интерфейсы социаль челтәрнең десктоплар өчен билгеләнгән вариантында барлыкка килде. Якын көннәрдә социаль челтәрнең iOS һәм Android операция системалары өчен мобиль варианты һәм кушымтасы да локальләштереләчәк.

«Одноклассники» социаль челтәренең татар телендәге версиясе өчен 80 меңнән артык сүз тәрҗемә ителде. Кулланучы яңа телне кушканнан соң, социаль челтәрдәге барлык хәбәрләр, шул исәптән электрон почта аша да, татар телендә киләчәк», - дип искәрттеләр социаль челтәрнең матбугат хезмәтендә.

Бүген «Одноклассники» социаль челтәренең Татарстандагы барлык кулланучылары да татар телендәге интерфейска күчү мөмкинлеге турында хәбәр алды.

• Хәзерге вакытта «Одноклассники» Татарстандагы иң популяр интернет-ресурсларның берсе. Ай саен социаль челтәргә республикадан 1,3 миллионнан артык уникаль кулланучы керә. Социаль челтәрдә татар телендәге 4 меңнән артык төркем исәпләнә.

Бу хакта тулырак: https://tatar-inform.tatar/news/2019/08/29/192473/