"Лучше всех" тапшыруында Казан кызчыгы катнашты

Казаннан барган 11 яшьлек флейтада уйнаучы Амелия Гатина Максим Галкин алып бара торган “Лучше всех!” программасының яңа ел чыгарылышында катнашты. Кызчык алып баручыга курай бүләк итте. Максим Галкин бүләк ителгән инструментта уйнарга тырышып карады, әмма кайнап торучы чәйнекне генә уйнап күрсәтә алды. Алып баручыга кызчык эт турында хыяллануын сөйләде. Теләге тормышка ашты да - аңа көчек бүләк ителде. Кыз моны күреп күз яшьләрен тыя алмады. Максим Галкин хөрмәтенә Амелия этне Макс дип атады. Кыз "Узган елгы кар ява" мультфильмыннан композицияне башкарды.