Бозаулар аласыңмы, үрдәк-казмы? Шәхси хуҗалык алып барырга теләүчеләргә Социаль яклау бүлегенә мөрәҗәгать итәргә кирәк

Мондый үзгәрешләр, нигездә, колхоз-совхозлар җимерелгәч барлыкка килде. Шулай да, авыл җирләрендә дә үз эшләрен ачып җибәреп, табыш алучылар юк түгел. Андыйларга дәүләт тә ярдәм итәргә тора. Әйтик, социаль бүлекләр аша социаль контракт төзергә була. Бу темага Яшел Үзән социаль яклау бүлеге җитәкчесе Регина Абдуллина ачыклык кертте.

– Чынлап та, авылда җире булган кешеләргә социаль яклау бүлеге белән контракт төзеп, шәхси хуҗалык алып бару мөмкинлеге бирелә. Шунда ук әйтергә кирәк, бу кредит түгел. Дәүләт шәхси ярдәмче хуҗалык алып бару өчен 200 мең сум күләмендә финанс ярдәме күрсәтә. 2024 елда безнең бүлеккә план буенча шундый 8 контракт төзү мөмкинлеге бирелгән иде. Аны бик теләп кабул итмәсәләр дә, аннан файдаланучылар булды. Әйтик, Каратмән, Олы Яке, Чүрчиле һәм Әйшә авылларында яшәүче берничә кеше безнең бүлек аша контракт төзеп, бозаулар, сарыклар, казлар сатып алды.

Быел планны тагын да арттырдылар, шундый типтагы 20 контракт төзергә була. Шуңа күрә, озакка сузмыйча, теләүчеләр безгә мөрәҗәгать итсен. Аның өчен документлар пакетын да артык күп җыярга кирәкми. Аңлашылмаса, бөтен сораулар белән авыл җирлеге башлыкларына мөрәҗәгать итәргә киңәш итәр идем. Аларның барысы да бу мәгълүмат белән таныш һәм аңлатма бирә алачак. Бизнес-план төзү мәсьәләсендә дә бернинди кыенлыклар булмаячак, чөнки ул гади һәм әзерләре дә бар. Әйтик, әгәр бозаулар алырга теләсәгез (күбрәк шулай эшлиләр дә), 200 мең сумның 50 меңенә терлек азыгы сатып алырга була. Әйткәнемчә, социаль контракт төзү авыр түгел һәм үз нәтиҗәсен дә күрсәтәчәк, – диде социаль яклау бүлеге җитәкчесе.

Мөһим!
Социаль контракт – социаль яклау органының, җан башына уртача кереме яшәү минимумыннан түбәнрәк булган аз керемле (Татарстан Республикасында билгеләнгән яшәү минимумыннан) гаиләләр яисә ялгыз яшәүче гражданнар белән төзелә торган шартнамә.

Шәхси ярдәмче хуҗалык алып бару өчен кирәкле товарлар, шулай ук авыл хуҗалыгы продукциясе сатып алуга бер мәртәбә 200 мең сумга кадәр түләү бирелә.

Кирәкле документлар:

• паспорт
• бизнес-план
• исәп-хисап реквизитлары
• хезмәт кенәгәсе

Документлар пакетын рәсмиләштерү һәм консультация алу өчен социаль яклау бүлегенә түбәндәге адрес буенча мөрәҗәгать итәргә кирәк: Яшел Үзән шәһәре, Карл Маркс урамы, 57В, 10нчы бүлмә.

Белешмәләр өчен телефон: 8 (84371) 4 -16-62