Якты йөзләре, тәмле сүзләре белән дәвалыйлар: Яшел Үзән районы Осиново авылы поликлиникасы тыштан да ялтырый, эчтән дә

Бистәбездә халык саны елдан-ел арта бара, пациентларга хезмәт күрсәтү өлкәсендә табиблар, шәфкать туташлары игелекле хезмәт башкара.

Бу язмамда мин поликлиникабызда уңышлы эшләп килүче көндезге стационар хакында сөйләргә телим. Бирегә килгән авыруларны тиешле дәрәҗәдә кабул итеп, аларга кирәкле дәвалау курсын билгеләп, шуны даими контрольдә тотучы өлкән табибыбыз Светлана Хәлилова һәм терапевт Олеся Юнысова олы ихтирамга лаек шәхесләр. Һәркемне ачык йөз, тәмле сүз белән каршы алып, югары дәрәҗәдә хезмәт күрсәтүче шәфкать туташларыбыз: Алия Бәдретдинова (19 ел), Алия Марусий (15 ел), Аделия Хуҗиева (17 ел) Казан медицина көллиятен тәмамлап, тырышлык, сабырлык сорый торган хезмәтне ныклы белем һәм тәҗрибәгә таянып башкаралар. Көндезге стационарга дәвалану теләге белән килгән авыруларны җылы каршы алулары, игьтибарлы булулары, тиешле дәвалау чараларын (система кую, укол кадау) аеруча җаваплылык белән башкаруларын күреп, тоеп торучы һәркем чын күңелдән чыккан рәхмәтләрен кат-кат әйтеп, бик канәгать булып китә. Хөрмәтле Светлана Садриисламовна, Олеся Владиковна, Алия Ризовановна, Алия Фоатовна, Аделя Аликовна, авыр, ләкин мактаулы хезмәтегездә уңышлар юлдаш булсын. Алдагы елларда да халкыбызга тырышып хезмәт итәргә язсын, дигән изге теләктә калабыз.

Саламәтлек – зур байлык. Шушы байлыкны сакларга ярдәм итүегез өчен, көндезге стационарга дәвалану теләге белән килүчеләр исеменнән, Раббыбызның рәхмәтләре явып торсын, ике дөнья бәхете насыйп булсын.

Күп санлы көндезге стационарда дәваланучылар исеменнән, лаеклы ялдагы укытучы

Тәнзилә Заһитова, Осиново