Подъездны кем җыештырырга тиеш? (сорау-җавап)

Фото: Рәзилә Хәйретдинова, «ЯҮ»

Сорауга җавапны «Татарстан Республика сында санитария һәм гигиена үзәге» ФБУЗның Яшел Үзән бүлеге консультатив пункты белгече Надежда Александрович бирә:

Подъездларны һәм гомуми файдаланудагы биналарны тәртиптә тоту – идарәче компаниянең туры бурычы.

Россия Федерациясе Хөкүмәтенең 2013 елның 3 апрелендәге 290нчы карары белән күпфатирлы йортларда гомуми милекне тиешенчә карап тоту өчен мәҗбүри эшләр һәм хезмәтләрнең минималь исемлеге расланган. Әлеге исемлеккә ярашлы, идарәче компания түбәндәге эшләрне башкарырга тиеш:

• тамбурларны, холларны, коридорларны, лифт яны мәйданчыкларын, лифт кабинасын, баскыч мәйданчыкларын, пандусларны коры һәм юеш ысул белән җыештыру;
• тәрәзә төпләрен, баскыч тоткычларын, почта тартмаларын, ишекләрне, ишек тоткаларын, электр счетчиклары шкафларын юеш чүпрәк белән сөртү;
• подъезд тәрәзәләрен юу;
• пычракны тоткарлаучы җайланмаларны (металл челтәрләр, келәмчекләр һ.б.) чистарту;
• гомуми биналарда кимерүчеләргә һәм бөҗәкләргә каршы эшкәртү (дератизация һәм дезинсекция) үткәрү.

Димәк, подъездларны җыештыру һәм тәрәзәләрне юу – идарәче компаниянең закон буенча башкарырга тиешле эшләре.