Ифтар берләштерә, рухландыра, дуслаштыра

Быел Яшел Үзән мөселманнары ифтар мәҗлесләрен тагын да активрак оештырды дисәк, ялгыш булмас. Шәһәрдәге дүрт мәчеттә һәр көнне җанлылык хакимлек итте, Тәравих намаз­лары укылды.

Шушы мөбарәк айның соңгы атнасында «Тарихи» мәчеттә узган үзенчәлекле ифтар мәҗлесе турында язмый мөмкин түгел. Бәйрәмгә, чын мәгънәсендә, татарның «каймагы», зыялылары җыелды. Анда республикадан мәртәбәле кунаклар һәм районыбыз башлыгы Михаил Афанасьев катнашты.

ФОТОРЕПОРТАЖ

Чара муниципаль район мөхтәсибе имам-хатыйбы Габделхәмит хәзрәт Зиннәтул­лин, Бөтендөнья татар конг­рессының Яшел Үзән бүлеге җитәкчесе Гөлнур Зыятдинова, «Ак калфак» республика татар хатын-кызлары җәмәгать оешмасының Яшел Үзән бүлеге җитәкчесе Гөлинә Саттарова оештыруында быел өченче тапкыр узып, анда туксаннан артык кеше катнашты.

Матур итеп мөселманча киенгән-ясанган һәм аккош­ларны хәтерләткән хатын-кызларыбызның йөзләре шат, күңелләре күтәренке иде. Ә кунак булып килгән мөхтәрәм ир-атлар түр башына узды. Биредә күптән күрешмәгән мәгариф хезмәткәрләренә, дус-ишләргә рәхәтләнеп аралашу мөмкин булды.

Мәҗлес алдыннан Бөтен­дөнья татар конгрессы, «Ак калфак» оешмалары вәкилләре һәм Михаил Афанасьев катнашында утырыш булды. Анда бүгенге көндә мөһим булган мәсьәләләр, мөселман чараларының кыйммәте турында сөйләшүләр алып барылды. Район башлыгы «Татарлар: үз өемдә – үз көем» радиосы хезмәткәрләренә интервью биреп, шәһәр һәм районның казанышлары, республикада тоткан урыны, данлыклы исем бирелү, бөек мәгърифәтче, якташыбыз Каюм Насыйриның юбилее турында сөйләде.

Ифтар мәҗлесен Габделхәмит хәзрәт Коръән укып башлап җибәрде һәм җыелучыларга ураза тотуның әҗер-саваплары турында сөйләде, вәгазьләр укыды. Бергәләп намаз укыл­ды. Мул итеп әзерләнгән табын артында кунаклар тәм-том, мәчетнең аш осталары әзерләгән телеңне йотарлык аш-су белән сыйланды. Бу чараны хөрмәтләп килгән кунакларга сүз бирелде.

– Катнашучыларга, оеш­тыручыларга зур рәхмәтемне җиткерәм. Сез бу чара аша мөһим эш башкарасыз. Мул тормышта яшәвебез өчен Аллаһ Тәгаләгә рәхмәтле булыйк. Яшел Үзән – үзенчәлекле шәһәр, халкы актив. Без бер илдә, республикада яшибез һәм безне дуслык берләштерә. Республика Рәисенә рәхмәтлебез. Без тарихны сыйдырган матур шәһәрдә яшәвебез белән горурланабыз, – диде Михаил Афанасьев.

Очрактан файдаланып, шуны билгеләргә кирәк, башлыгыбыз – Михаил Павлович, ифтар мәҗлесләрендә актив катна­шырга, динебезне олыларга, Рамазан аена, мөселманнарга карата хөрмәтен күрсәтергә тырыша.

Бөтендөнья татар конгрессы Башкарма комитеты җитәкчесе урынбасары Ирек Шәрипов, җыелучыларны Бөтендөнья татар конгрессының Милли Шурасы рәисе Васил Шәйхра­зыев исеменнән сәламләп, конгресс эшчәнлеге турында сөйләде.

– Бүгенге көндә республикада гына түгел, регионнарда да күләмле ифтарлар узды­рылу сөендерә. Милли җәмәгатьче­лек оеш­тырган эшләр өметле булуы белән аерыла. Шундый матур чара үткәргән өчен район җитәкчелегенә, Конгресс һәм «Ак калфак» оешмаларына олы рәхмәтемне җиткерәм. Киләчәктә дә шулай бергә яшик, – диде ул.

Бу чарага зур теләкләр белән килгән Бөтендөнья Татар Конгрессы каршында эшләүче Бөтенроссия Татар гаиләсе фонды директоры Миләүшә Гайфуллина чиксез рәхмәтен җиткереп: «Сез барыгыз да киң күңелле, тормыштан ямь табып эшләүчеләр. Яшел Үзәндә безнең фондның филиалын ачарга ниятлибез һәм аңа җитәкче эзлибез. Үзем табиб буларак, барыгызга ныклы сәламәтлек телим!» – диде.

Гомумән, бу мәҗлестән кү­ренгәнчә, мондый очрашулар халкыбызга бик кирәк. Ди­мәк, киләсе Рамазан аен­да да җәмәгатьчелек үз миссиясен үтәр, – дусларын, милләттәшләрен, мөселман пәрвәрләрне җыяр дигән теләктә калыйк. Габделхәмит хәзрәт әйткәнчә, «Күркәм ифтар мәҗлесләрендә укыган догалар, һичшиксез, кабул була. Бу дөньяда файдалы шә­хесләр булып яшәргә һәм хезмәтебезнең нәтиҗәсен күрергә язсын!»

Һәр катнашучы бу дәрәҗәле ифтардан канәгать калып, аннан үзенә тәмле ризыклардан тыш, рухи азык та алды. Барыбызга да җан тынычлыгы, күңел байлыгы, бәрәкәтле тормыш, бетмәс-төкәнмәс сәламәтлек, гаилә иминлеге насыйп булсын. Амин!