***
Бисмилләһир-рахмәнир-рахим. Йә Әр-Рахман, йә Әр-Рахим! Улымны Үз рәхмәтең белән урап ал. Күңеленә ныклы иман, йөрәгенә изгелек, тормышына бәрәкәт бир. Сине яратып, Сиңа шөкер итеп, Сиңа таянып яшәүче хәерле бәндәләреңнән кыл. Йә Әл-Һади! Улымны һәрвакыт туры юлдан алып бар. Аңа дөрес белән ялгышны, хәерле белән хәерсезне аера белерлек акыл, зирәклек һәм гыйлем бир. Карарларын дөрес, ниятләрен чиста, гамәлләрен хәерле кыл.
Йә Әл-Фәттәх! Улым алдында хәерле ишекләрне ач. Хезмәтенә уңыш, тапкан малына бәрәкәт бир. Аны бурычтан, мохтаҗлыктан һәм хәрам ризыкка якынаюдан сакла. Биргән байлыгыңны изгелеккә кулланырга, якыннарына ярдәм итәргә һәм һәр нигъмәтең өчен шөкер итәргә насыйп ит. Йә Әл-Хәфиз! Улымны юлларда, эшендә, өйдә һәм чит җирләрдә Үзең сакла. Бәла-казалардан, авырулардан, начар кешеләрдән, яман күздән һәм күренгән-күренмәгән бөтен зарардан сакла. Тәненә сәламәтлек, күңеленә тынычлык, гомеренә бәрәкәт бир.
Йә Әл-Вәдүд, йә Әл-Ләтыйф! Улымның йөрәген мәхәббәт белән тутыр. Аңа үзе яратырдай һәм аны чын күңелдән яратып, хөрмәт итеп, аңлап яшәүче хәерле, иманлы, күркәм холыклы тормыш иптәше насыйп ит. Хәерле никах бир. Йә Әл-Вәһһәб! Улымны хәерле нәсел дәвамчылары белән сөендер. Аңа сәламәт, иманлы, акыллы, күркәм холыклы балалар насыйп ит. Нәселендә Сине танып, Сине яратып, ата-аналарына дога кылучы хәерле буыннар дәвам итсен.
Йә Әл-Галим, йә Әл-Хәким! Улымның акылын камил, фикерен тирән, күңелен киң кыл. Аңа гыйлем, зирәклек, сабырлык, көчле рух һәм күркәм холык бир. Кешеләр белән матур мөгамәләдә булырга, үз сүзендә торырга, намуслы һәм мәрхәмәтле булып яшәргә насыйп ит. Йә Әл-Мүҗиб! Улымның Сиңа әйткән догаларын кабул ит. Йөрәгендә йөрткән хәерле хыялларын беләсең — аларны иң матур рәвештә һәм иң хәерле вакытта чынга ашыр. Ул хәтта сорарга да белмәгән, әмма аның өчен хәерле булган нигъмәтләрне дә насыйп ит.
Йә Раббым! Улым өчен мин теләгән барлык хәерләрне насыйп ит. Мин әйтә алмаган, әмма ана йөрәгемдә булган теләкләремне дә Син беләсең. Аның өчен мин сораганнан да артыграк, мин күз алдына китергәннән дә матуррак язмыш насыйп ит. Аны бу дөньяда да, ахирәттә дә бәхетле бәндәләреңнән кыл. Әмин, йә Раббәл-галәмин.
Алсу Исмәгыйлева
Нет комментариев