Киләчәк гаскәренә – Яшел Үзәннән!: Пилотсыз системаларда хезмәт итүнең серләре һәм 2,9 миллионлы контракт

Әлеге яңалыкны ишеткәч, «ничек кушылырга?» дигән сораулар күп булды. Шуңа күрә без Яшел Үзән хәрби комиссариатына ашыктык – анда эш чынлап кайный!

Хәрби комиссариатның сайлап алу пункты инструкторы Самат Миңнеханов белән без дусларча, җылы очраштык. Ул да яңа гаскәр турында сөйләргә кирәклеген исбатлап күрсәтте.

– Самат Салаватович, безнең якташларны иң дулкынландырган сорауларга ачыклык кертик әле. Яңа гаскәр – ул нинди? Анда хезмәт итүнең махсус серләре бармы?

 Әлбәттә, бар! Бу киләчәк гаскәре! Безнең операторлар заманча пилотсыз очучы аппаратлар, йөзүче катерлар, хәтта чылбырлы «Странник» дроннары белән идарә итәчәк. Кызыгы шунда: контракт нибары бер елга гына төзелә! Әйе, сез дөрес ишеттегез бер ел. Ул озынайтылмый, автомат рәвештә сузылмый. Хезмәт иттең, тәҗрибә тупладың – һәм яңадан сайларга хокукың бар. Моннан тыш, сезне башка гаскәргә күчермәячәкләр – махсуслашуыгыз саклана. Ә күрше төбәкләрдәге уку полигоннарында иң ким дигәндә ике ай дәвамында чын оста булырга өйрәнәчәксез!

 Ә бүгенге көндә контракт төзү өчен нинди суммалар тәкъдим ителә? Бу да бик мөһим.

– Монда инде без, татарстанлылар, бөтен илгә үрнәк! 1 гыйнвардан башлап түләүләр 2,9 миллион сумга кадәр артты. Бу – Россия буенча иң югары күрсәткечләрнең берсе! Сумма ике өлештән тора: 2,5 миллионы – республикабыз бюджетыннан, 400 меңе – Оборона министрлыгыннан. Әлеге акчалардан тыш, МХОда катнашучыларга билгеләнгән барлык социаль гарантияләр дә гамәлдә.

Татарстанда бүгенге көндә мондый ярдәм чаралары 3 меңгә якын!

– Кандидатларга таләпләр үзгәрдеме? Кемнәрнең бу гаскәргә эләгү мөмкинлеге зуррак?

– Төп таләпләр – элеккечә: 18 яшьтән 45 яшькә кадәр, сәламәтлек буенча яраклылык, белем (урта гомуми яки һөнәри). Тик бер сер бар: компьютерга  «син» дип дәшкән егетләргә биредә юл ачыграк! Ник дигәндә, аларның кул моторикасы яхшырак, ә геймерлар өчен дрон идарәсе интерфейсы таныш булачак – өйрәнү тизрәк бара. Өч этаплы укыту да каралган: шәхси әзерлектән алып полигоннарда чын сугышчан куллануга кадәр.

– Яшел Үзәннән теләк белдерүчеләр күпме соң?

– Егетләрнең кызыксынуы зур, саны арта бара. Күпләр хәтта срочный хезмәт урынына менә шушы заманча гаскәрдә хезмәт итәргә тели. Шуңа күрә безнең комиссариат ишекләре һәркемгә ачык! Әгәр сездә дә пилотсыз аппаратлар белән идарә итүче оператор булу теләге бар икән – килегез, без сезгә документлар җыярга, медицина тикшеренүен узарга булышырбыз, юл күрсәтербез.

Яшел Үзән хәрби комиссариаты сезне көтә! Монда илнең киләчәге, заманча гаскәрнең алгы сафлары төзелә.