Синоптиклар Россиядә бүтән кыш булмаячак, дип белдерде

Кышның калган өлеше Россиянең Европа өлешенә салкыннар һәм кар көртләре китермәячәк. Мәскәүдә, гомумән, сезон ахырына кадәр температура нормадан 5 градуска югары булачак. Бу хакта синоптик Евгений Тишковец белдерде. Аның сүзләренә караганда, быел яз шактый иртә киләчәк: мартта һава температурасы нормадан 4 градуска, апрельдә 3 градуска югары булачак.

Мондый вәзгыятьне без глобаль җылыну аркасында күзәтәбез - узган 2024 ел Җир температурасын тикшерү тарихында иң кызу ел булды, дип билгеләп үттеләр Copernicus Европа хезмәтендә: уртача глобаль температура беренче тапкыр Цельсий буенча индустриаль дәрәҗәдән 1,5 градуска артты.