1 сентябрьдән Россиядә дистәләгән яңа закон һәм норматив акт үз көченә керә – алар мәктәп белеменнән алып финансларга һәм хезмәт мөнәсәбәтләренә кадәр тормышның бөтен өлкәләренә тәэсир итәчәк.
Цифрлы сум һәм финанслар
Сентябрьдән цифрлы сумның – милли валютаның өченче формасын массакүләм куллану башлана. Зур банклар клиентларга цифрлы сумнар ачу, күчерү һәм сатып алулар өчен түләү мөмкинлеген бирергә бурычлы. Кереме 120 млн сумнан арткан зур сәүдә компанияләре дә цифрлы сумны кабул итә башларга тиеш. Куллану ирекле булып кала.
Шул ук вакытта Росфинмониторинг «Мир» карталары һәм QRкодлар аша операцияләрне күзәтә башлаячак. Шулай ук ясалма интеллект турында беренче закон үз көченә керә, ул ИИ технологияләрен эшләү һәм кертүне көйли.
Гаиләләргә – ипотека каникуллары
Ике яки күбрәк баласы булган гаиләләр, икенче яки чираттагы бала туганнан соң, бер ярым елга кадәр ипотека каникулларын рәсмиләштерә алачак. Иң мөһим яңалык: кичектерү алу өчен керем кимүен раслау кирәкми. Кредит 15 млн сумнан артмаска, ә торак бердәнбер булырга тиеш.
Хезмәт хокуклары
Эш бирүчеләргә өч яшькә кадәр баласы булган хатын-кызларга сынау срогы билгеләү тыела. Артык эш сәгатьләренең еллык лимиты, коллектив килешүдә каралган очракта, 120 сәгатьтән 240 сәгатькә кадәр артырга мөмкин. МХО катнашучылары штат кыскартканда эш урыннарын саклап калуда өстенлекле хокук ала.
Мәктәпләр һәм белем
Укучыларга дәрес вакытында мобиль телефоннар куллану тыела. Гадәттән тыш хәлләрдә генә рөхсәт ителә. Һәр төбәктә ун мәктәптә 2–8нче сыйныф укучыларының үз-үзен тотышын өч баллы шкала буенча бәяләү тәҗрибәсе башлана: «үрнәк», «рөхсәт ителгән» һәм «рөхсәт ителмәгән». Аттестатка бәяләр тәэсир итмәячәк. «Оборона һәм Ватанны саклау нигезләре» фәне ике курска аерыла: «Тормыш иминлеге нигезләре» һәм «Башлангыч хәрби әзерлек».
Медицина
МРТны табиб юлламасыз да ясарга мөмкин булачак. Диспансеризациягә киңәйтелгән липид профиле һәм йөрәк ишемия авыруы куркынычын бәяләү өстәлә. Түләүле медицина хезмәтләре килешүләрен онлайн төзергә рөхсәт ителә.
Пенсияләр
Иминият пенсиясенә фиксацияләнгән түләү августта 80 яшь тулган яки I группа инвалидлыгы билгеләнгән гражданнарга ике тапкыр арта – өстәү 9,6 меңнән 19,2 мең сумга кадәр булачак. Җыелма пенсияләр – 17,3%ка, вакытлы түләүләр 19,32%ка автомат рәвештә, гаризасыз артачак.
Башка яңалыклар
Җәмәгать транспорты тукталышларында тәмәке, вейп һәм башка никотинлы продукция сату тыела. Россиялеләр азарт уеннарында катнашуга үз-үзләренә тыю (самозапрет) куя алачак. Башка төбәккә күчкәндә мобиль номерны саклап калырга рөхсәт ителә. Чит ил кешеләре өчен мәҗбүри медицина тикшерүе срогы 90 көннән 30 көнгә кадәр кыскара.
Нет комментариев