Татарстан мөфтие һәм Яшел Үзән районы башлыгы Хәйрия ярышы стартына чыкты

"Без оештыручыларның нәкъ менә Зеленодольскида Хәйрия ярышы уздырырга карар итүләренә шатбыз. Безнең шәһәр спорт белэн дус. Бүген биредә бик күп катнашучылар җыелды, шул исәптән яшьләр дә, бу сөендерми кала алмый. Кем күпме вакыт узса да, иң мөһиме - сәламәт яшәү рәвеше һәм спорт безнең тормышта һәрвакыт булсын", - дип билгеләп үтте Афанасьев.

Бу кояшлы көнне "Маяк" стадионы меңнән артык баланы, профессиональ атлетларны һәм сәламәт яшәү рәвешен яратучыларны берләштерде. Старт алдыннан ук тәҗрибәле белгечләр җитәкчелегендә массакүләм зарядка узды. Дәртле музыка астында катнашучылар физик күнегүләр башкарды.

Парк трассасын беренче булып балалар сынап карады. Алар өчен 500 метр дистанция әзерләнгән. Соңыннан узышта ТР мөселманнары Диния нәзарәте башлыгы һәм Татарстан мөфтие Камил Сәмигуллин, Яшел Үзән районы башлыгы Михаил Афанасьев һәм «Кеше приюты» попечительләр советы рәисе Ильяс Гыймадов катнашты.

"Әгәр кеше якшәмбе иртәсендә кросска торса – бу инде җиңүче, Ул ялкаулыгын, арыганлыгын җиңде. Рухи һәм физик яктан көчле кеше үз җәмгыятенә күбрәк файда китерәчәк. Барысына да яхшы ярышлар, кәеф һәм, иң мөһиме, йөгерешнең җәрәхәтләрсез узуын һәм уңай эмоцияләр генә китерүен телим», – дип ассызыклады Татарстан мөселманнары Диния нәзарәте башлыгы.

"Бүген балалар бик күп, бу сөендерми кала алмый, чөнки безнең балаларыбыз тән белән генә түгел, рух белән дә сәламәт булганда, илебезнең киләчәге булачак. Ярыш үткәрү яхшы традициягә әверелде дип ышанам. "Кеше приюты" проекты бизнес җәмәгатьчелеге ярдәме белән көн саен 2 меңнән артык кешене туендыра. Алга таба без тагын да яхшырак эшләр башкарачакбыз», – диде Ильяс Гыймадов.

Шуны билгеләп үтәргә кирәк, ярышны «Меценаты» бизнес-берләшмәсе Яшел Үзән районы администрациясе белән берлектә хәйрия эшчәнлеген популярлаштыру, сәламәт яшәү рәвешен пропагандалау һәм халыкны физик культура һәм спорт белән актив шөгыльләнүгә җәлеп итү өчен үткәрде.

Ярыш кысаларында «Кеше приюты»проектыннан тәмле һәм хуш исле пылауны бушлай тарату оештырылды. Шулай ук теләгән һәркем үзе белән кием алып килеп, мохтаҗларга тапшыра алды.