26–30 августта «Идел»дә Татар яшьләре көннәре башлана

Татар яшьләре көннәре — туган җиреннән еракта гына түгел, бәлки төрле илләрдә яшәүче татар егетләре һәм кызларын бер мәйданга җыючы уникаль форум. Бу очрашу яшьләргә яңа дуслар, яңа белемнәр, яңа мөмкинлекләр ача.

Форумның төп максаты — Россиянең ерак төбәкләрендә һәм чит илләрдә яшәүче татар яшьләре арасында милли рухны күтәрү, туган телгә, тарихыбызга һәм гореф-гадәтләребезгә карата мәхәббәт уяту.

Быел Татар яшьләре көннәрендә Россия Федерациясенең 27 төбәгеннән һәм Казахстаннан барлыгы 180 делегат катнашачак. Аларны биш көнлек бай программа көтә: остазлар белән очрашулар, татар теле һәм тарихы дәресләре, кызыклы лекцияләр, күңелле кичке чаралар. Шулай ук һәркем үзен вокал, бию, актерлык сәнгате яки кул эшләре буенча сынап карый алачак. Программада сәясәт, сәнгать, журналистика, дин, спорт өлкәләрендә танылган шәхесләр белән очрашулар аерым урын ала. Очрашулар лекция, остаханә, панель дискуссияләр һәм тере әңгәмә форматында узачак. Катнашучылар спикерларга сорау бирә, үз фикерләре белән уртаклаша, башка төбәкләрдән килгән фикердәшләре белән аралаша алачак.

Традиция буенча, быел да «Идел кызы», «Идел егете», «Танцпол йолдызы» һәм «Идел моңы» бәйгеләре уздырылачак. Иң актив, иң талантлы яшьләр исемнәре халыкка танылачак.