«Бу серле космос»: Күгәй авылында Космонавтика көненә багышланган мавыктыргыч чара узды

«Бу серле космос» дип исемләнгән мәгълүмати танып-белү сәгате кече яшьтәге мәктәп балаларын галәм серләре белән таныштыру максатыннан оештырылды.

Чара барышында балалар:

• беренче космонавт Юрий Алексеевич Гагаринның тормыш юлы һәм аның данлыклы очышы турында;
• беренче хатын-кыз-космонавт Валентина Терешкова турында;
• галәм киңлекләре, планеталар, йолдызлар турында кызыклы мәгълүмат алды.

Әмма чараның иң кызыклы өлеше — уеннар иде. Балалар зур теләк белән түбәндәге уеннарда катнашты:

• «Айга очыш» — тизлек, осталык һәм игътибар таләп иткән күнегү;
• «Ракетада очабыз» — командада эшләү, бердәмлек күнекмәсе;
• «Табышмаклар» — космос турында табышмаклар чишү, акылны үстерү;
• «Кояш тирәли әйләнеп йөри торган планеталар» — галәм законнарын уен аша аңлау.

Һәр уен космос темасына бәйле булып, балаларның яшенә туры килде. Алар күтәренке кәеф, дәртләнеп уйнадылар, яңа белемнәр алдылар.

— Алга таба да мондый очрашулар, танып-белү сәгатьләре дәвамлы булсын иде. Космос — ул серләр дөньясы. Һәр бала — киләчәкне ачучы, – дип сөйли Рәмзия Заһидуллина, Күгәй мәдәният йорты сәнгать җитәкчесе.