Бөек Җиңүнең 81 еллыгы: Күгәй авылында узган митинг хәтер һәм горурлык бәйрәменә әверелде

Митингта төрле буын вәкилләре бергә җыелды. Бу изге көндә сугыш чоры балалары, хезмәт коллективлары, җәмәгатьчелек вәкилләре, мәктәп укучылары һәм хәтта балалар бакчасында тәрбияләнүчеләр дә катнашты. Һәркемнең йөзендә Җиңү бәйрәменә хөрмәт һәм баһадир бабаларыбызга чиксез рәхмәт чагыла иде.

Чараны Күгәй авыл җирлеге башлыгы Фәния Хайбулла кызы Хисаметдинова ачып җибәрде. Ул җыелган халыкны чын күңелдән бәйрәм белән котлады, һәркемгә нык сәламәтлек, гаилә бәхете, тыныч тормыш һәм аяз күк йөзе теләде.

«Һәрберебез Җиңүнең бәһасын белергә тиеш. Бабаларыбызның батырлыклары онытылмас, алар безгә ирекле һәм матур тормыш бүләк итте», – дип ассызыклады авыл җирлеге башлыгы.

Митингның иң тәэсирле өлеше – балаларның чыгышлары булды. Мәктәп укучылары һәм балалар бакчасы тәрбияләнүчеләре сугыш елларының ачы хакыйкатен, солдатларның көндәлек батырлыгын һәм озак көткән Җиңү шатлыгын шигырь юллары һәм көйләр аша җиткерделәр. Кечкенә генә йөрәкләрнең ихлас сүзләре күпләрнең күзләренә яшь китерде. 

Митингның иң мөһим өлешендә хәтер һәм горурлык мизгеле булды. Яу кырында ятып калган, яки туган авылына әйләнеп кайтканнан соң бакыйлыкка күчкән батыр якташларыбыз бер минут тынлык белән искә алынды. 

Митинг һәйкәлләргә чәчәкләр салу белән тәмамланды. Авыл халкы, кунаклар, ветераннар һәм яшь буын вәкилләре бер-бер артлы истәлек стелласына һәм мемориалларга чәчәк бәйләмнәре китереп куйдылар.

Бөек Җиңү көне – бу безнең тарихка, безнең тамырларыбызга хөрмәт. Ул – тыныч күк йөзе, балаларның шат көлүе, имин тормыш өчен көрәшкән буынга мәңгелек рәхмәт.