Каюм Насыйри исемендәге архитектура-этнография комплексы

Тасвирлама:
Каюм Насыйри исемендәге архитектура-этнография комплексы 1997 елның 1 мартында Татарстан Республикасы Яшел Үзән районы Олы Ачасыр авылында ачыла. Ул XIX гасыр ахыры – XX гасыр башы татар крестьяны утарын тасвирлый һәм күренекле татар мәгърифәтчесе, галим Каюм Насыйри (1825-1902) исеме белән бәйле. 2019 елда биредә туристик маршрут эшләнә.
Адресы:
Зеленодольск районы, Олы Ачасыр авылы, Тукай ур., 44

1926 елда Кече Шырдан авылында Каюм Насыйри йорты торгызыла һәм 1947 елда ул Олы Ачасыр авылына күчерелә. 1993 елда «Совет» колхозы рәисе Сабитов Рәис Ислам улы йортны сатып алып, музей өчен тапшыра. Биредә беренче реставрация эшләре үткәрелә. Каюм Насыйри исемендәге архитектура-этнография комплексы 1997 елның 1 мартында Татарстан Республикасы Яшел Үзән районы Олы Ачасыр авылында ачыла. Ул XIX гасыр ахыры – XX гасыр башы татар крестьяны утарын тасвирлый һәм күренекле татар мәгърифәтчесе, галим Каюм Насыйри (1825-1902) исеме белән бәйле. Аңа нигез салучы – Абзалина Рәмзия Әсрар кызы. Комплекс составына крестьян йорты, мунчасы һәм зур булмаган турыпочмаклы ишегалдының периметры буйлап урнашкан берничә хуҗалык корылмалары – «кияү келәте», абзар һәм сарайлар, галимнең иҗади остаханәсе, ат җигү өчен лапас керә. Төп фонд предметларының гомуми саны 2021 елның 1 маена – 931. Нигездә, бу гамәли сәнгать, көнкүреш һәм этнография җиһазлары. Бүгенге көндә музейның төп эшчәнлеге: тарихи урыннарны һәм биналарны, Каюм Насыйриның мәдәни чоры турында истәлекләрне саклау, Олы Ачасыр авылының тарихи мирасын чагылдыручы материаллар җыю һәм өйрәнү. 2019 елда биредә туристик маршрут эшләнә һәм «Татар авылына сәяхәт. Каюм Насыйри мирасы» грантын оталар. Бу объектка туристларны җәлеп итүне арттырырга мөмкинлек бирә.