2024 елда Яшел Үзән шәһәре һәм районы юлларында кешеләр зыян күргән 65 юл-транспорт фаҗигасе теркәлгән

Безнең барыбыз да хәзер юл-транспорт хәрәкәтендә катнашучылар. Җәяүлеләр булсынмы, транспорт чарасын йөртүчеләрме. Шуларның берсе генә кагыйдә үтәми икән, эш харап, фаҗига чыгасын көт тә тор.

Яшел Үзәндә юл хәрәкәте иминлеге комиссиясенең йомгаклау утырышында районда еш чыга торган юл-транспорт һәлакәте сәбәпләренә анализ ясалды.

– Үлем белән тәмамланган юл-транспорт һәлакәтләренең төп сәбәпләренең берсе – җәяүлеләрнең юлны тиешсез урында кичүе. Юл күременең начарлыгы, шулай ук җәяүлеләрнең аек булмавы 6 кешенең үлеменә китерде, – диде Яшел Үзән ЮХИДИ бүлеге җитәкчесе Рамил Идиятуллин.

2024 елда 2023 ел белән чагыштырганда юл-транспорт фаҗигаләре һәм шулай ук һәлак булучылар саны кимесә дә, тынычланырга урын юк. Кеше гомерләре куркыныч астына куелу дәвам итә.

– Муниципалитет тарафыннан кирәк булган бөтен нәрсәне без бүген үк эшли башлаячакбыз. Төп бурычларның берсе – юл-транспорт һәлакәтен концентрацияләү урыннарын ачыклау һәм аларны булдырмый калу. Җәяүлеләр өчен кичүләрне яктыртуга аерым игътибар биреләчәк, – диде Яшел Үзән районы башкарма комитеты җитәкчесе урынбасары Александр Старостин.

Районда нинди профилактика эшләре алып барылуы турында сөйләгән «Юл хәрәкәте иминлеге» Дәүләт идарәсенең Яшел Үзән бүлеге җитәкчесе Зөлфия Шакирова түбәндәгеләрне билгеләп узды:

– Мәктәпләрдә, балалар бакчаларында системалы рәвештә актив эш алып барыла. Ра­йонда яшь инспекторлар хәрәкәте отрядлары төзелде. Хәзер 75 отряд булып, аларда 1325 бала исәпләнә. Алар юл-транспорт һәлакәтләрен профилактикалау­га юнәлдерелгән акция­ләрдә катнаша. Мәктәп отрядларының төп эш күрсәткече – «Иминлек тәгәрмәче» бәйгесе. Анда ел саен 20 команда көч сынаша. Аларны әзерләүдә шәһәрнең 14нче лицее һәм Татар Танае урта мәктәбе командалары алда бара.

Зөлфия Шакирова сүзләренә караганда, тагын бер эш формасы – юл-транспорт хәрәкәте иминлеге темасы буенча күчмә театрлар күрсәтүгә зур игътибар бирелә. 2024 елда шулай бушлай биш театр күрсәтелгән. Гомумән, район һәм шәһәрдә өлкәннәр арасында да профилактикага юнәлтелгән чаралар бик күп уздырылган. Әйтик, мөмкинлекләре чикләнгән автомобильчеләр арасында машина йөртү осталыгына бәйгене былтыр җиденче тапкыр оештырганнар. Шулай ук, предприятие­ләр хезмәткәрләре, йөк машиналарын, өлкән яшьтәге, студент йөртүчеләр, автомобильче хатын-кызлар арасында уздырылган бәйгеләр дә традициягә әйләнгән.

2024 ел нәтиҗәләре буенча, муниципаль ра­йон юлларында 16 яшькә кадәрге балалар катнашында 9 юл-транспорт фаҗигасе теркәлеп, аларда 9 бала җәрәхәтләнгән. 2023 ел белән чагыштыр­ганда фаҗигаләр санының кимүе күзәтелә.

Утырышта ЮХИДИ бүлеге җитәкчесе аек булмаган машина йөртүчеләр катнашында фаҗига очракларының ешаюын билгеләп үтте:

– Исерек хәлдә автомобиль белән идарә иткән йөртүчеләрне тоткарлау өчен быел безгә табель коралын кулланырга туры килде. Юл-патруль хезмәте инспекторлары штабын арттырыр­га кирәк. Бу бигрәк тә Карамалы Тау, Зур Ключи һәм Осиновога кагыла.

Биредә күтәрелгән мәсьәләләрне йомгаклап, шуны әйтергә кирәк: позитив динамика күзәтелүгә карамастан, юллардагы вәзгыять катлаулы булып кала. Дәүләт автоинспекциясе хезмәткәрләре юл хәрәкәте кагыйдәләрен тупас бозуларны ачыклау һәм булдырмау буенча актив эшли. Әмма шуны истә тотарга кирәк: әйләнә-тирәбездәге кешеләрнең тормышы һәм сәламәтлеге безнең һәрберебезгә бәйле.