Путинга мобилизацияләнгән 9 меңнән артыграк кешенең өйләренә кайтарылу сәбәбен әйткәннәр

Арада сәламәтлеге начар булу сәбәпле берничек тә мобилизацияләнергә тиеш булмаучылар да бар. Россия Генераль прокуроры Игорь Краснов Президент Владимир Путинга шул хакта сөйләп үткән.

Прокурор әйтүенчә, махсус хәрби операция үткәрү чорында кораллы көчләр һәм илнең оборона-сәнәгать комплексында законнарның ни дәрәҗәдә үтәлүен контрольдә тоту эше көчәйтелгән. Ул шулай ук хәрби хезмәткә чакырылучыларны бронежилетлар, башка кирәк-ярак белән тәэмин итү проблемасының тулысынча хәл ителүен искәрткән. Хәзер прокуратура хәрбиләргә кышкы кием җибәрүне контрольдә тота икән.