Горький заводы «Наше время - Безнең заман» фестивале җиңүчеләре арасында

Быел әлеге чарада республиканың 190 предприятиесеннән һәм оешмасыннан 1,5 меңнән артык үзешчән артист – эшче һөнәр вәкилләре катнашты. Яшел Үзәнне Горький исемендәге Зеленодольск заводында эшләүче егетләр һәм кызлар тәкъдим итте.

– Фестивальгә әзерлек өч айдан артык барды, – ди Горький исемендәге заводның яшьләр оешмасы җитәкчесе һәм чарада катнашучы Александр Саушин. – Көрәш авыр, әмма кызыклы булды. Респуб­ликабызның иҗади коллективлары – көчле көндәшләр, тик без дә Яшел Үзән эшче яшьләренең бер дә калышмавын, ә кайдадыр, хәтта өстен булуын исбатлый алдык. Командалар күп, номерлар тагын да һәм икенче урынга өметләнүемә карамастан, безнең белән нинди көчле командалар бер дәрәҗәдә булуын исәпкә алып, призлы өченче урынны яулавыбызга шатмын.

Горький исемендәге завод командасында 17 кеше. Өч ай эчендә сигез номер әзерләнә, шуларның дүртесе призга лаек булды. Һәм, кайчандыр сәхнәдә чыгыш ясаган кеше буларак, бу искиткеч нәтиҗә дип әйтә алам. Александрдан фестивальнең киләсе сезоны турында сорагач, Саша: «Күбрәк вакыт, күбрәк кеше, күбрәк номерлар һәм күбрәк тырышлык кирәк! Моны без киләсе елда тормышка ашырачакбыз», – диде.
Ә быел «Наше время — Безнең заман» эшче яшьләр иҗаты фестиваленең Гран-при иясе «СИБУР. Нижнекамскнефтехим» командасы булды. Җиңүчеләрне бүләкләү тантанасы дүшәмбе көнне гала-концерт кысаларында узды.

Төп бүләкне Татарстан Республикасы Рәисе Рөстәм Миңнеханов тапшырды. Республика башлыгы карары белән Гран-при акчалата премиясе күләме бер миллион сумга җиткерелгән.

Горький исемендәге завод яшьләренең «Наше время – Безнең заман» фестивалендә лаек булган бүләкләре:

• Хореография (ансамбльләр) – I урын
• Хореография (кече формалар) – III урын
• Дан минуты – I урын
• Визитка презентациясе – III урын
• Гомумкоманда зачеты – III урын