Бакчаны кече улым исеменә күчерә аламмы?

– Хосусый милкегез булган җир участогы һәм йорт белән идарә итү сезнең хокукта. Юридик яктан караганда, хәл түбәндәге рәвештә: олы улыгыз төзелештә һәм бакча эшләрендә шулай ук катнашкан. Акча биргән, аерым йөкләмәләрне үтәгән. Хәтта гаилә әгъзалары өчен ризык әзерләү дә юк нәрсә түгел, ә уртак хезмәткә өлеш кертү. Шуңа күрә ул, әлеге дачаның күпмедер өлеше аңа тиешле дип уйларга хокуклы. Кече улыгызга аны бөтенләе белән бүләк итүегез белән килешмичә, әни мине варислыктан мәхрүм итте, дип, суд аша мондый килешүгә каршы чыга ала. Ә судның нинди карарга килүе – икенче мәсьәлә. Хаттан күренгәнчә, сезнең арада уртак йорт салу турындагы килешү төзелмәгән. Балалар бары тик аналарына булышканнар һәм аларның ярдәм итү дәрәҗәсе төрле. Ана кеше әлеге күчемсез милекне, кем көчне күбрәк керткән, шуңа бүләк итәргә карар кылган. Бу законлы. Шуңа күрә, суд зур улыгызның таләбен канәгатьләндермәстер. Ә хат авторының улы белән судлашудан соң уңай хисләр кичерү-кичермәве – икенче мәсьәлә. Һәм аның икенче юлы да бар бит. Мәсәлән, күчемсез милекне ике балага да мирас итеп калдыру. Аның белән нишләргә кирәген, сез үлгәннән соң, алар үзара хәл итәр.