«Авылга кайтырлык белгечләрне мәктәптән әзерли башларга кирәк»: Түбән Урысбагада хисап сессиясе
Районда хисап сессияләре дәвам итә. Шуларның берсе, Түбән Урысбага авылы җирлегендә тыныч, көн тәртибендә каралганча алып барылды. Аның эшендә муниципаль район башлыгы урынбасары Николай Бызин катнашып, җирлекнең эшчәнлеге, халкы һәм проблемалары белән танышты. Мәдәният йорты халык белән тулы булмаса да, сораулары булганнар килгән иде. Ә биредә алар, гадәттә, бик күп булмый, ел әйләнәсендә халык белән аңлашып яшәү үз нәтиҗәсен күрсәтә.
Түбән Урысбага җирлегендә авыллар һәм юллар төзек, ә халкы ярдәмчел һәм кунакчыл.
Җирлек башлыгы Хәйдәр Сибгатуллин чыгышыннан аңлашылганча, узган хисап елында җыелган 208 000 сум үзсалым акчасына дәүләт 832 000 сум өстәгәч ул 1 040 000 сум тәшкил иткән. Бу акча территорияне төзекләндерүгә юнәлтелгән.
Бюджет үтәлешенә килгәндә, анысын да җирлек 100 процентка үтәгән. Салымнар тиешле күләмдә җыелган.
– Махсус хәрби операциядә катнашучыларга ярдәм итәбез, – дип сөйли җирлек башлыгы. – Егетеләребезгә җылы оекбашлар бәйләп, токмач кисеп җибәрелде. Яңа ел алдыннан матди ярдәм җыелды. Бу уңайдан авыл халкына рәхмәт белдерәм. Яшәүчеләрне газ, су, элемтә белән тәэмин итүдә өзеклекләргә юл куелмады, чөнки оешмалар эшләрен тиешле югарылыкта оператив алып барды.
Чынлап та, ярдәм дә, ял да итә белә алар. Традицион бәйрәмнәрне лаеклы уздырган кебек, хәзер балык тотуны күләмле бәйгегә әйләндерә алганнар. Моны сессиядә катнашкан Николай Бызин да билгеләп үтте:
– Сезнең территория өчен 2004 ел бик үзенчәлекле булды. Бәчек авылының 810 еллыгын зурлап уздырдыгыз. Бәйрәмнәр моның белән генә тәмамланмый әле. Алда бөек мәгърифәтче Каюм Насыйриның тууына 200 ел тулуны, Бөек Җиңүнең 80 еллыгын билгеләү кебек зур даталар да бездән зур җаваплылык таләп итә. Ә сездә чараларны оештыра беләләр. Авыллар да монда төзек һәм матур, ә халык кунакчыл һәм эшчән. Сезгә алда да зур уңышлар телим.
Биредә Бөек Җиңүнең 80 еллыгына әзерлекне башлап җибәргәннәр инде. Җирлектә бу көнгә бер сугыш ветераны да исән түгел, анысы аңлашыла, ә җиде тыл ветераны бар. Димәк, хөрмәтне аларга юнәлтергә кирәк булыр. Алар сугышның үзен күрмәсә дә, михнәтен нык татыган кешеләр.
Хуҗалыклар һәм яшәүчеләр саны:
1. Түбән Урысбага – 49 хуҗалык – 80 кеше
2. Югары Урысбага – 33 – 78
3. Кече Ачасыр – 28 – 51
4. Бәчек – 50 – 120
5. К.Таң – 0 – 0.
Биш авыл кергән бу җирлектә дә, башкалардагы кебек үк халык саны артуга таба бармый. Хисап чорында 4 кеше бакыйлыкка күчкән.
Кем күпме:
– Мәктәпкәчә яшьтәге балалар – 2
– Мәктәптә укучылар – 11
– Пенсионерлар – 105
– Хезмәткә яраклылар – 121
– 35 яшькә кадәрге яшьләр – 26 кеше.
Эш урыннарын булдыру яшьләрне авылда калдыру өчен стимул булыр иде. Биредә шундый инициатива күрсәтүче барлыкка килгән килүгә. Мәсәлән, Рәсил Хәйруллин җиләк үстерә башлавы турында презентация ясады. Кызыклы гына фикерләр яңгырады.
Язманың дәвамын газетабызның №4 (31 гыйнвар, 2025) санында укырга мөмкин.
Следите за самым важным и интересным в Telegram-каналеТатмедиа
Нет комментариев