Каз үләне бик күп шифалы сыйфатларга ия

Әлеге үләнне нәрсәдәндер файдалы дип уйламыйбыз да. Чөнки ул аяк астында, нәкъ кеше таптап йөри торган сукмакларда рәхәтләнеп үсә. Бездә аны күпчелек бәбкә яки йорт үләне дип атыйлар (русча атамасы – спорыш, птичий горец). Исемен дә, каз, үрдәк, тавыклар яратып ашаганга шулай атаганнардыр инде. Кешеләр нәрсәгә дә санамаган бу табигать бүләге бик күп шифалы сыйфатларга ия һәм аның шундый булуын борынгылар белгән һәм кулланган.

Сидек бүлеп чыгару системасы патологияләре булганда. Гадәттә каз үләне сидек-җенес системасы авырулары вакытында билгеләнә, бу сидек кудыру эффекты белән бәйле. Үлән бөерләрдән таш чыгаруны яхшырта һәм хирургия катнашын булдырмаска ярдәм итә. Шулай ук, микробларга каршы тәэсир итә, бу пиелонефритны (бөер тукымалары ялкынсынуы) профилактикалауда бик мөһим.

Канны туктату үзлекләре. Ул кан китүне туктатырга һәм яра өслеген дезинфекцияләргә ярдәм итәчәк. Элек бу үләнне, дару препаратлары булмаганда, ярага яки җәрәхәткә бәй­ләгәннәр.

Яраларны төзәтүгә тәэсире. Каз үләненең хайваннарда нәтиҗәле кулланылуы билгеле. Мөгезле эре терлек еш кына бөҗәк тешләвеннән интегә. Мондый яраларга вакланган каз үләнен куярга була. Ул җәрәхәтләрең тизрәк төзәлүенә ярдәм итә.

Кан тамырлары тукымасына йогынтысы. Бу үлән кан тамырлары тукымасына да уңай йогынты ясый. Аның составына керүче компонентлар нормаль кан басымын сакларга сәләт­ле һәм кан тамырларын то­нус­лый. Каз үләнен төрле авыруларны профилактикалау максатында кулланырга мөм­кин. Анда, барлык органнар һәм системаларның дөрес эш­лә­ве өчен мөһим, бик күп файдалы матдәләр, вита­миннар күп. Каз үләненең бер­ничә яфрагында гына да аскорбин кислотасының һәм К витаминының тәүлеклек нормасы бар.

Гомуми ныгыту тәэсире. Бу үлән организмны ныгыта, «бөтен нервыларым бетте» халәте белән көрәшә, чыдамлылыкны арттыра һәм кичергән авырулардан соң көч бирә. Еш кына аны йокысызлык, баш авыртулары һәм нерв системасы авырулары вакытында билгелиләр.

Ашкайнату тракты авы­рулары вакытында. Ул авыз куышлыгы, ашказаны һәм эчәклек, шулай ук уникилле эчәклекнең ялкынсынуын бетерә ала. Үсемлек компонентлары гастрит, диарея һәм метеоризм вакытында уңай нәтиҗә бирә.

Сулыш органнары белән проблемалар булганда. Каз үләнен сулыш органнары авыруларын дәвалау өчен комплекслы терапиягә кертергә мөмкиннәр. Ул бронхиаль астма, бронхит, коклюш һәм плеврит симптомнарын бетерә ала.

Гинекологиядә куллану. Каз үләне составында канны туктаткыч һәм беректергеч файдалы матдәләр күп. Гинекологиядә бу үсемлекне аналыкта кан китүен туктату, фибромиоманы дәвалау өчен, гиперменорея һәм бала булмаудан кулланырга мөмкиннәр. Шулай ук, ул аналыкның бала тудырганнан соңгы чорда тиз тернәкләнүе өчен дә нәтиҗәле.

Каз үләне медикаментоз дәвалауны алыштыра алмый һәм өстәмә терапия чарасы булып тора. Ләкин профилактика чарасы буларак, ул сәламәтлек торышын яхшыртырга һәм дәвалау нәтиҗәсенә ярдәм итә ала.

Фото: freepik