Февральдә бакча эшләре

Әмма белүче бакчачылар, февральдә дә бакчада эш табарга була, дияр. Алар арасында иң мөһиме – агачларны яшәртү, ягъни ботакларын сирәкләү.

Болай эшләү өч файда бирә:
 

җимешләр эреләнә;
җимеш бирәчәк ботаклар тизрәк үсә һәм уңыш 20-60%ка арта;
агачларның салкыннарга каршы торучанлыгы арта һәм аларны авырулардан, корткычлардан эшкәртү җиңеләя.

 
Кәүсәсен кыскарту. 

Оптималь биеклек – 2 м. Шулай җимешләрне җыярга да уңайлы. Кәүсәне скелет ботагыннан 1-2 см өстәнрәк кисәргә кирәк. Төп итеп калдырсаң, чериячәк һәм башында куыш барлыкка киләчәк. Ябалдашның эченә таба үскән барлык яшь ботак­лардан арыну хәерле. Алар агачны куелата, һава һәм дымны тоткарлый – корткычларга һәм авыруларга уңай мохит тудыра. 

Дөрес итеп сирәкләнгән агач касә формасында булырга тиеш – уртасында бушлык, барлык ботаклар тышкы якта. Никадәрле сирәкләнгән?

Бакчачыларда «ябалдаш аша чыпчык иркен очып чыгарга тиеш» дигән гыйбарә бар. Ә ян-як скелет ботакларының озынлыгы якынча 2,5 м булыр­га тиеш һәм аларны тышка карап торган кырый ботакка кисәләр.

Агачларны агарту. Гадәттә агачларны көзен агарталар. Кышын да ярый, иң мөһиме февраль уртасына кадәр өлгерегә кирәк. Чөнки февраль ахыры – март башында әле җебетеп, әле катырып, температура кискен уйный башлый. Шул сәбәпле кояш нурлары астында агачның кайрысы 20 градускача җылынырга, ә төнлә 20 градускача суынырга мөмкин. Аерма 40 градус! Шундый тирбәлеш аркасында кәүсә «пешү» алырга мөмкин һәм моннан аны бары тик агарту гына коткара. Моның өчен махсус водоэмульсия куллану кулай.