Банан яхшы кәеф өчен җавап бирә

Организмда су балансын көйли, бөерләр, йөрәк-кан тамырлары системасы өчен кирәк булган калий да бар аның составында. Магнийның исә йөрәк мускулы һәм скелет мускуллары өчен файдасы күп. Шуңа да бананны спорт белән шөгыльләнүчеләргә ашарга киңәш итәләр.

Ул кандагы глюкозаны тиз арттыра. В9 витамины, ягъни фолий кислотасы үзәк нерв системасы өчен файдалы.

Бананда организмда серотонин, гади тел белән әйткәндә, бәхет гормонына әверелә торган тирозин дигән аминокислота да бар. Димәк, банан яхшы кәеф өчен дә җавап бирә.

Артык гәүдә авырлыгыннан һәм шикәр авыруыннан җәфаланучыларга белгечләр яшел яки яшькелт-сары банан ашарга тәкъдим итә. Алар глюкозаны азрак күтәрә икән.

Ә өлгергән сары бананда витамин һәм макро- һәм микроэлементлар күбрәк. Аларда клетчатка һәм шикәр дә шактый.

Көненә уртача зурлыктагы бер яки ике банан ашарга рөхсәт ителә.